Latest Headlines:

ထိုင်း-မြန်မာနယ်စပ်ရှိ ကရင်စစ်ဘေးရှောင် ကလေးငယ်များ အကြမ်းဖက်စစ်ကောင်စီ၏ လေကြောင်းအန္တရာယ်ကြားမှ ထိတ်လန့်စွာ ပညာသင်ကြားနေရ ကရင်နယ်စပ် ၊ ဩဂုတ် ၇ ၊ Horizons အကြမ်းဖက်စစ်ခေါင်းဆောင် မင်းအောင်လှိုင် ဦးဆောင်သည့် စစ်ကောင်စီက နိုင်ငံတစ်ဝန်းရှိ အရပ်သားပြည်သူများနှင့် စာသင်ကျောင်းများကို လေကြောင်းမှ ဗုံးကြဲတိုက်ခိုက်ကာ စစ်ရာဇဝတ်မှုများကို အရှိန်အဟုန်မြှင့် ကျူးလွန်နေချိန်တွင်၊ ထိုင်း-မြန်မာနယ်စပ်ရှိ ကရင်စစ်ဘေးရှောင် ကျေးရွာများမှ ကလေးငယ်များသည် နေ့စဉ်နှင့်အမျှ စစ်ဘေးအန္တရာယ်နှင့် စိုးရိမ်ထိတ်လန့်မှုများကြားမှပင် ပညာသင်ကြားနေကြရကြောင်း သိရသည်။ အကြမ်းဖက်စစ်အုပ်စုသည် နိုင်ငံတစ်ဝန်းလုံးရှိ စစ်ရေးပစ်မှတ်မဟုတ်သည့် စာသင်ကျောင်းများ၊ ဆေးရုံများနှင့် အရပ်သား လူနေကျေးရွာများကို ဂျက်ဖိုက်တာများ၊ ဒရုန်းများ အသုံးပြု၍ ရည်ရွယ်ချက်ရှိရှိ ပစ်မှတ်ထား သတ်ဖြတ်မှုများ ဆက်တိုက်ကျူးလွန်လျက်ရှိရာ၊ ယင်းစစ်ပွဲ၏ ဆိုးကျိုးများသည် နယ်စပ်ဒေသအထိ ကျယ်ပြန့်စွာ သက်ရောက်လျက်ရှိသည်။ စစ်တပ်အာဏာသိမ်းပြီးချိန်မှစ၍ စစ်ကောင်စီတပ်ဖွဲ့များသည် စာသင်ကျောင်းများကို ပစ်မှတ်ထား တိုက်ခိုက်မှုပေါင်းများစွာ ကျူးလွန်ခဲ့ပြီး ကလေးသူငယ်များနှင့် ဆရာ၊ ဆရာမ အများအပြား အသက်ဆုံးရှုံးခဲ့ရသည်။ နယ်စပ်အနီးရှိ ကရင်စစ်ဘေးရှောင် စာသင်ကျောင်းများတွင်လည်း လေကြောင်းတိုက်ခိုက်မှု အန္တရာယ်ကြောင့် စာသင်ကျောင်းများအနီးတွင် ဗုံးခိုကျင်းများ တူးထားရပြီး ကလေးငယ်များ၏ ပညာသင်ကြားခွင့်နှင့် လုံခြုံရေးမှာ ပြင်းထန်စွာ ခြိမ်းခြောက်ခံနေရသည်။ ထို့ပြင် ကလေးငယ်များသည် အဆိုပါ အကောက်ကြံ ရက်စက်သည့် တိုက်ခိုက်မှုများကြောင့် စိတ်ပိုင်းဆိုင်ရာ ထိခိုက်ဒဏ်ရာရရှိမှုများ (Trauma) ကိုပါ ရေရှည်ခံစားနေကြရသည်။မိမိပြည်သူအပေါ် ရက်စက်စွာ သတ်ဖြတ်နေသည့် မင်းအောင်လှိုင် ဦးဆောင်သော စစ်အုပ်စုအား ထိုင်းအစိုးရအပါအဝင် အိမ်နီးချင်းနိုင်ငံအချို့က သံတမန်ရေးအရ အသိအမှတ်ပြု ဆက်ဆံမှုများ ပြုလုပ်နေခြင်းအပေါ် ဒေသခံများနှင့် တော်လှန်ရေးအင်အားစုများက ပြင်းထန်စွာ ဝေဖန်ရှုတ်ချလျက်ရှိသည်။ စစ်ကောင်စီ၏ အကြမ်းဖက်မှုများကြောင့် စက်ဆုပ်ဖွယ် အခြေအနေသို့ ရောက်ရှိနေရသည့် နယ်စပ်ဒေသမှ ကလေးသူငယ်များ၏ ဘဝကို ထိုင်းအစိုးရအနေဖြင့် ပိုမိုအလေးထား ရှုမြင်ရန် တောင်းဆိုမှုများလည်း ထွက်ပေါ်နေသည်။ မင်းအောင်လှိုင် ဦးဆောင်သည့် စစ်ကောင်စီသည် ၎င်းတို့၏ အာဏာတည်မြဲရေး တစ်ခုတည်းအတွက်သာ အရပ်သားပြည်သူများနှင့် ကလေးသူငယ်များကိုပါမချန် ပစ်မှတ်ထားကာ လေကြောင်းမှ ဗုံးကြဲခြင်း၊ ရွာစဉ်လှည့် မီးရှို့ခြင်း စသည့် စစ်ရာဇဝတ်မှုများကို နည်းမျိုးစုံဖြင့် ကျူးလွန်နေခြင်းဖြစ်သည်။ ပြည်သူလူထုကို သတ်ဖြတ်နေသည့် စစ်ခေါင်းဆောင် မင်းအောင်လှိုင်နှင့် စစ်အုပ်စုအား အိမ်နီးချင်းနိုင်ငံများအနေဖြင့် သံတမန်ရေးအရ အသိအမှတ်ပြု ဆက်ဆံနေခြင်းသည် လူ့အခွင့်အရေးနှင့် နိုင်ငံတကာစံနှုန်းများကို ပြောင်ပြောင်တင်းတင်း ချိုးဖောက်နေခြင်းဖြစ်ပြီး၊ စစ်ဘေးဒဏ်သင့် ကလေးသူငယ်များ၏ ဒုက္ခကို မျက်ကွယ်ပြုရာ ရောက်နေပေသည်။ ထို့ကြောင့် နိုင်ငံတကာ အသိုင်းအဝိုင်းအနေဖြင့် စစ်ကောင်စီ၏ ဥပဒေမဲ့ ကျူးလွန်မှုများကို ထိရောက်စွာ တားဆီးရန်နှင့် ပြစ်ဒဏ်ကင်းလွတ်ခွင့် ရရှိနေမှုများကို အမြန်ဆုံး အဆုံးသတ်ပေးရန် မဖြစ်မနေ လိုအပ်လျက်ရှိကြောင်း တိုက်တွန်းနှိုးဆော်ထားသည်။ ( video - LUNG LUNG LAN ) #ကရင်နယ်စပ် #စစ်ဘေးရှောင်ကလေးငယ်များ #စစ်ကောင်စီ #လေကြောင်းတိုက်ခိုက်မှု #Horizons

Horizons News ည ၈ နာရီ နောက်ဆုံးရသတင်းများ အကျဉ်းချုပ် (၆.၈.၂၀၂၆) ဒီကနေ့ ည ၈ နာရီ Horizons News ရုပ်သံအစီအစဉ်တွင် တင်ဆက်ပေးခဲ့သည့် ပြည်တွင်း၊ ပြည်ပ အဓိကသတင်းများကို အောက်ပါအတိုင်း အတိုချုပ် ဖတ်ရှုနိုင်ပါသည် - နိုင်ငံရေး၊ ဆန္ဒပြမှုနှင့် အုပ်ချုပ်ရေး သတင်းများ ဆန္ဒပြမှု - အာဏာသိမ်းစစ်ခေါင်းဆောင် မင်းအောင်လှိုင်၏ ထိုင်းခရီးစဉ်ကို ကန့်ကွက်သည့်အနေဖြင့် ဘန်ကောက်မြို့ UN ရုံးရှေ့တွင် မြန်မာများ ဆန္ဒပြ။ ထိုင်းအစိုးရအနေဖြင့် စစ်ကောင်စီနှင့် ပူးပေါင်းဆောင်ရွက်မှုများ ရပ်တန့်ရန် ထိုင်းအရပ်ဘက်အဖွဲ့ (၁၆) ဖွဲ့ တောင်းဆို။ ကြပ်မတ်မှု - ပြည်ပရောက် မြန်မာလုပ်သားများထံမှ ဝင်ငွေခွန်နှင့် ငွေလွှဲမှုများကို တရားဝင်လမ်းကြောင်းမှ မဖြစ်မနေ ရရှိရေးကြပ်မတ်ရန် စစ်ကောင်စီက ကော်မတီ ဖွဲ့စည်း။ တရားမဝင်ဝင်ရောက်မှု - တာချီလိတ်မြို့နယ်အတွင်းသို့ တရားမဝင် ဝင်ရောက်လာသည့် တရုတ်နိုင်ငံသား (၄၁) ဦး ဖမ်းဆီးခံရ။ ငွေညှစ်မှု - လက်ပံတန်းမြို့နယ်တွင် စစ်မှုထမ်းကြေးများကို အကြိမ်ကြိမ် အတင်းအဓမ္မ ကောက်ခံနေပြီး ကျေးရွာအုပ်ချုပ်ရေးမှူးများ ကိုယ်ကျိုးရှာ အလွဲသုံးစားလုပ်နေ။ စစ်ရေးနှင့် လေကြောင်းတိုက်ခိုက်မှု သတင်းများ လေကြောင်းတိုက်ခိုက်မှု - ကြို့ပင်ကောက်မြို့နယ် အင်တိုင်းကုန်းကျေးရွာကို Y-12 ဖြင့် ဗုံးကြဲ၍ အသက် (၁) နှစ်အရွယ် ကလေးအပါအဝင် ပြည်သူ (၆) ဦး ဒဏ်ရာရပြီး နေအိမ်များပျက်စီး။ မြောက်ဦးမြို့ရှိ စစ်ရှောင်စခန်းများကို လေကြောင်းမှ ဗုံးကြဲ၍ ပြည်သူ (၄) ဦးနှင့် ကျွဲနွားများ ထိခိုက်။ မြေပြင်စစ်ရေး - ကော့သောင်း မလိဝမ်းချောင်းဝတွင် စစ်ကောင်စီနှင့် ပူးပေါင်းတပ်များ တိုက်ပွဲဖြစ်ပွားပြီး စစ်ကောင်စီဘက်မှ (၁) ဦး သေဆုံး၊ (၁) ဦး ဒဏ်ရာရ။ သာယာဝတီတွင် စစ်တပ်သတင်းပေးနှင့် ပျူစောထီး (၂) ဦး ဖမ်းဆီးစဉ် ခုခံထွက်ပြေးသဖြင့် ပစ်ခတ်ဖမ်းဆီးရာမှ သေဆုံး။ မှုခင်း၊ လူ့အခွင့်အရေးနှင့် သဘာဝဘေး သတင်းများ ရေဘေးအန္တရာယ် - လေးမျက်နှာမြို့နယ်တွင် တာကျိုးပေါက်၍ ပြည်သူ (၂) ဦး သေဆုံးကာ ပြည်သူအချင်းချင်းသာ ကူညီနေရ။ တန့်ဆည်နှင့် ကန့်ဘလူတွင် မူးမြစ်နှင့် စည်တုံလုံးချောင်းရေလျှံ၍ ကျေးရွာ (၄၀) ကျော် ရေကြီးပြီး တံတား (၂) စင်း ကျိုးကျပျက်စီး။ မိုးကောင်းမြို့တွင်လည်း ရေများ စတင်ဝင်ရောက်နေ။ ဖမ်းဆီးနှင့် ငွေညှစ်မှုများ - ဘီးလင်းတွင် ရဲတပ်ကြပ်၏ ညီအပါအဝင် လူငယ် (၇) ဦးကို စစ်တပ်ကဖမ်းဆီးပြီး စစ်သားစုဆောင်းရေးစခန်းသို့ ပို့ဆောင်။ တောင်ကြီးတွင် ယာဉ်ထိန်းရဲမှူးက လိုင်စင်မဲ့ကားစီးပြီး ပြည်သူများကို ငွေညှစ်ဖမ်းဆီးနေ။ မန္တလေး နှာပေါက်စစ်ဆေးရေးဂိတ် နေရာပြောင်းပြီး ခရီးသွားများကို တင်းကျပ်စွာစစ်ဆေး ငွေညှစ်နေ။ ဟင်္သာတတွင် ပျောက်ဆုံးဆိုင်ကယ် ပြန်ရရန် ရဲက ငွေကျပ် (၁၀) သိန်းအထိ မတရားတောင်းခံ။ စစ်ရေးဒဏ် - ကရင်နီပြည်နယ်နှင့် ကယန်းဒေသတွင် ဇူလိုင်လအတွင်း စစ်ရေးပဋိပက္ခများကြောင့် နေအိမ် (၁၀) လုံးကျော် ထပ်မံပျက်စီးခဲ့ကြောင်း PKPF ထုတ်ပြန်။ နိုင်ငံတကာ သတင်း အင်ဒိုနီးရှား/မလေးရှား - အက်စတက်စီ (Ecstasy) မူးယစ်ဆေးပြား ၇ သောင်းကျော် မှောင်ခိုသယ်ဆောင်လာသည့် မလေးရှားလေယာဉ်မှူး အင်ဒိုနီးရှား (ဂျာကာတာလေဆိပ်) တွင် ဖမ်းဆီးခံရပြီး သေဒဏ်ကျခံရနိုင်ဖွယ်ရှိ။ ပိုမိုစုံလင်သော သတင်းများကို အောက်ပါလင့်ခ်များတွင် ဆက်လက်ဖတ်ရှု နားဆင်နိုင်ပါသည် - Website: www.thehorizonsnews.com နေ့စဉ် နောက်ဆုံးရသတင်းများကို အချိန်နှင့်တပြေးညီ သိရှိနိုင်ရန် Facebook, YouTube, Telegram နှင့် TikTok တို့တွင် Horizons News ကို Follow လုပ်ထားရန် ဖိတ်ခေါ်အပ်ပါသည်။

အက်စတက်စီ မူးယစ်ဆေးပြား ၇ သောင်းကျော် မှောင်ခိုသယ်ဆောင်လာသည့် မလေးရှားလေယာဉ်မှူး အင်ဒိုနီးရှားတွင် ဖမ်းဆီးခံရ ဂျာကာတာ ၊ ဩဂုတ် ၆ ၊ Horizons ကွာလာလမ်ပူမှ ဂျာကာတာသို့ ခရီးသည်တင်လေယာဉ်ကို ကိုယ်တိုင်မောင်းနှင်လာသည့် အသက် (၃၉) နှစ်အရွယ် မလေးရှားလေကြောင်းလိုင်းမှ လေယာဉ်မှူးတစ်ဦးသည် အက်စတက်စီ (Ecstasy) မူးယစ်ဆေးပြား အမြောက်အမြား မှောင်ခိုသယ်ဆောင်လာမှုဖြင့် အင်ဒိုနီးရှားနိုင်ငံ၊ ဂျာကာတာမြို့ရှိ ဆူကာနို-ဟာတာ (Soekarno-Hatta) အပြည်ပြည်ဆိုင်ရာလေဆိပ်တွင် ဖမ်းဆီးခံခဲ့ရသည်။ လေဆိပ်အကောက်ခွန်အရာရှိများက ၎င်း၏ ခရီးဆောင်အိတ်ကို X-ray ဖြင့် ဖြတ်သန်းစစ်ဆေးရာမှ မသင်္ကာဖွယ်ရာများ တွေ့ရှိခဲ့ရသဖြင့် အသေးစိတ် ရှာဖွေမှုများ ပြုလုပ်ခဲ့သည်။ ထိုသို့ ရှာဖွေရာတွင် ခရီးဆောင်အိတ်အတွင်း အထူးတလည် ဝှက်၍ သယ်ဆောင်လာသော အလေးချိန် (၂၆) ကီလိုဂရမ်ရှိ အက်စတက်စီ ဆေးပြားပေါင်း ၇၀,၀၀၀ ကျော်နှင့် စိတ်ကြွဆေးဝါးများကို ဖော်ထုတ်သိမ်းဆည်းရမိခဲ့ခြင်း ဖြစ်သည်။ အဆိုပါ လေယာဉ်မှူးကို ဆက်လက်စစ်ဆေးမှုများ ပြုလုပ်ရာတွင် ၎င်းကိုယ်တိုင် မူးယစ်ဆေးဝါး သုံးစွဲထားကြောင်း တွေ့ရှိရသည့်အပြင် မူးယစ်ဆေးဝါး ဆီးစစ်ချက်ရလဒ်ကို လိမ်လည်ရန်အတွက် ဆီးအတုထည့်ထားသည့် ပုလင်းငယ်ကိုပါ တစ်ပါတည်း ယူဆောင်လာကြောင်း စစ်ဆေးပေါ်ပေါက်ခဲ့သည်။ စုံစမ်းစစ်ဆေးမှုများအရ ၎င်းသည် အင်ဒိုနီးရှားနိုင်ငံသို့ မူးယစ်ဆေးဝါး မှောင်ခိုသယ်ဆောင်ခြင်းကို ယခုအကြိမ်နှင့်ဆိုပါက (၃) ကြိမ်တိုင်တိုင် ကျူးလွန်ခဲ့ဖူးကြောင်း သိရသည်။ လက်ရှိတွင် အဆိုပါလေယာဉ်မှူးသည် အင်ဒိုနီးရှားနိုင်ငံ၏ အလွန်တင်းကျပ်သော မူးယစ်ဆေးဝါး တိုက်ဖျက်ရေးဥပဒေများအရ အမြင့်ဆုံးပြစ်ဒဏ်ဖြစ်သည့် "သေဒဏ်" ဖြင့် အရေးယူခံရနိုင်ဖွယ်ရှိနေကြောင်း သိရှိရသည်။ #အင်ဒိုနီးရှား #မလေးရှား #လေယာဉ်မှူး #မူးယစ်ဆေးဝါး #နိုင်ငံတကာသတင်း

ဒီးမော့ဆိုသို့ စစ်ကြောင်းထိုးလာသည့် စစ်ကောင်စီတပ် တိုက်ခိုက်ခံရပြီးနောက် လွိုင်ကော်သို့ ပြန်လည်ဆုတ်ခွာ ဒီးမော့ဆို ၊ ဩဂုတ် ၆ ၊ Horizons ကရင်နီပြည်နယ်၊ ဒီးမော့ဆိုမြို့နယ်အတွင်း နယ်မြေစိုးမိုးထိန်းချုပ်နိုင်ရန် အင်အား (၂၀၀) ကျော်ဖြင့် စစ်ကြောင်းထိုးလာသည့် စစ်ကောင်စီတပ်သည် ကရင်နီတော်လှန်ရေး မဟာမိတ်ပူးပေါင်းတပ်များ၏ တိုက်ခိုက်မှုကြောင့် အထိနာကာ လွိုင်ကော်မြို့သို့ ပြန်လည်ဆုတ်ခွာသွားကြောင်း မဟာမိတ်တပ်မှူးတစ်ဦး၏ ပြောကြားချက်ကို ကိုးကား၍ သိရသည်။ အဆိုပါ စစ်ကောင်စီစစ်ကြောင်းသည် ပြီးခဲ့သည့် ဇူလိုင်လ (၁၈) ရက်နေ့ကတည်းက လွိုင်ကော်ဘက်မှ ဒီးမော့ဆိုဒေသသို့ စတင်ထိုးစစ်ဆင် ဝင်ရောက်လာခဲ့ခြင်းဖြစ်သည်။ ဖမ်းဆီးရမိထားသည့် စစ်ကောင်စီတပ်သားတစ်ဦး၏ ထွက်ဆိုချက်အရ ယင်းစစ်ကြောင်းတွင် အင်အား (၂၃၀) ခန့် ပါဝင်ကြောင်း သိရသည်။ တိုက်ပွဲများ ဖြစ်ပွားပြီးနောက် ဩဂုတ်လ (၃) ရက်နေ့ ညနေ ၄ နာရီခန့်တွင် စစ်ကောင်စီတပ်သည် စစ်ကား (၁၀) စီးခန့်ဖြင့် လွိုင်ကော်မြို့သို့ ပြန်လည်ဆုတ်ခွာသွားခဲ့သည်။ သို့သော်လည်း ဒီးမော့ဆိုမြို့အတွင်းရှိ နေရာအချို့နှင့် အထူးသဖြင့် ငါးထပ်တိုက်တစ်ခုတွင် စစ်ကောင်စီတပ်ဖွဲ့ဝင်အချို့ ဆက်လက် တပ်စွဲထားဆဲဖြစ်ကြောင်း သိရသည်။ ဇူလိုင်လ (၁၈) ရက်နှင့် (၁၉) ရက်နေ့များက ဒေါင်းငံခါးဒေသ၌ နှစ်ဖက်အကြား တိုက်ပွဲများ ပြင်းထန်စွာ ဖြစ်ပွားခဲ့ပြီး စစ်ကောင်စီဘက်မှ အထိနာခဲ့သဖြင့် လေကြောင်းပစ်ကူများပါ ခေါ်ယူအသုံးပြုခဲ့ရသည်။ (၁၅) ရက်ခန့် ကြာမြင့်ခဲ့သည့် ယင်းတိုက်ပွဲများအတွင်း စစ်ကောင်စီဘက်မှ ဗျူဟာမှူးအဆင့် အရာရှိတစ်ဦး၊ တပ်ကြပ် (၄) ဦးနှင့် တပ်သားအများအပြား သေဆုံးခဲ့ကာ ထိခိုက်ဒဏ်ရာရရှိသူများလည်း များပြားခဲ့ကြောင်း ဒေသခံများက ပြောဆိုကြသည်။ သို့ရာတွင် အဆိုပါ ထိခိုက်ကျဆုံးမှု အရေအတွက်နှင့် ပတ်သက်၍ သီးခြားအတည်ပြုနိုင်ခြင်း မရှိသေးပေ။ ထို့ပြင် စစ်ကောင်စီတပ်သည် တော်လှန်ရေးတပ်ဖွဲ့များ ခိုအောင်းနေထိုင်သည်ဟု စွပ်စွဲကာ ခရစ်ယာန် ကက်သလစ်ဘုရားကျောင်း၊ အုပ်ချုပ်ရေးမှူးနေအိမ်နှင့် ငါးထပ်တိုက်အပါအဝင် အရပ်သား အဆောက်အအုံများကို လက်နက်ကြီးများဖြင့် ပစ်ခတ်ဖျက်ဆီးခဲ့ကြောင်း မြေပြင်သတင်းရင်းမြစ်များက ဆိုသည်။ လက်ရှိ မြေပြင်အခြေအနေများနှင့် ပတ်သက်၍ မဟာမိတ်တပ်မှူးက စစ်ကောင်စီအနေဖြင့် လွိုင်ကော်၊ ဒီးမော့ဆိုနှင့် မိုးဗြဲဒေသများအကြား တပ်အင်အားများကို အပြန်အလှန် ရွှေ့ပြောင်းအသုံးပြုနေရသည့် အခြေအနေဖြစ်နေပြီး လေယာဉ်များဖြင့် ကင်းထောက်ပျံသန်းမှုများကိုမူ ဆက်လက် လုပ်ဆောင်နေဆဲဖြစ်ကြောင်း သုံးသပ်ပြောဆိုထားသည်။ #ကရင်နီပြည်နယ် #ဒီးမော့ဆို #စစ်ကောင်စီ #တော်လှန်ရေးတပ်ဖွဲ့ #Horizons

Horizons News ည ၈ နာရီ နောက်ဆုံးရသတင်းများ အကျဉ်းချုပ် (၅.၈.၂၀၂၆) ဒီကနေ့ ည ၈ နာရီ Horizons News ရုပ်သံအစီအစဉ်တွင် တင်ဆက်ပေးခဲ့သည့် ပြည်တွင်း၊ ပြည်ပ အဓိကသတင်းများကို အောက်ပါအတိုင်း အတိုချုပ် ဖတ်ရှုနိုင်ပါသည် - နိုင်ငံရေး၊ လူ့အခွင့်အရေးနှင့် စစ်မှုထမ်းဥပဒေ သတင်းများ ဆန္ဒပြမှု - လန်ဒန်မြို့ရှိ မြန်မာ၊ ထိုင်း၊ မလေးရှားနှင့် စင်ကာပူ သံရုံးများရှေ့တွင် မင်းအောင်လှိုင်ကို ဖိတ်ခေါ်ဆက်ဆံခြင်းများ မပြုလုပ်ရန် ဗြိတိန်ရောက် မြန်မာများ ဆန္ဒပြ။ KWAN ဖွဲ့စည်းခြင်း - ကရင်လူမျိုးများ၏ အခွင့်အရေး၊ ရေရှည်တည်တံ့သော ငြိမ်းချမ်းရေးနှင့် နိုင်ငံတကာ အကူအညီများ ပိုမိုရရှိရေးအတွက် "ကရင်ကမ္ဘာလုံးဆိုင်ရာ ရှေ့နေကွန်ရက် (KWAN)" အသစ် တရားဝင်ဖွဲ့စည်း။ စစ်မှုထမ်းဥပဒေ - စစ်မှုထမ်း အပတ်စဉ် (၂၇) တွင် လူမပြည့်၍ သင်တန်းဖွင့်ရက် နောက်ကျခဲ့ရပြီး အပတ်စဉ် (၂၈) အတွက် ကြိုတင်စုဆောင်းရန် ညွှန်ကြား။ စစ်မှုထမ်းပြီးသူများကို ပြည်ပအလုပ်အကိုင် ဦးစားပေးစေလွှတ်ရန် အလုပ်သမားဝန်ကြီး ထပ်မံညွှန်ကြား။ တရားမျှတမှုတောင်းဆိုချက် - NUG/MOD လက်အောက်ခံ ကန့်ဘလူခရိုင် အမှတ် (၂) တပ်ရင်းမှ ဖမ်းဆီးထိန်းသိမ်းထားသည့် ရဲဘော်ဆာဂျင်၏ ဇနီးဖြစ်သူက တရားမျှတမှုနှင့် ပွင့်လင်းမြင်သာမှုရှိရန် တောင်းဆို။ စစ်ရေးနှင့် လေကြောင်းတိုက်ခိုက်မှု သတင်းများ လေကြောင်းတိုက်ခိုက်မှုများ - ရခိုင်ပြည်နယ် မြောက်ဦးမြို့နယ်တွင် Y-12 နှင့် ဂျက်တိုက်လေယာဉ်များဖြင့် ဗုံးကြဲ။ ကရင်နီပြည်နယ် ဖရူဆိုမြို့နယ်တွင် ဒရုန်းဖြင့် ဗုံးကြဲ၍ (၅) လသားအရွယ် ကလေးငယ်အပါအဝင် အရပ်သား (၅) ဦး သေဆုံးပြီး အချို့ ပြင်းထန်ဒဏ်ရာရ။ မြေပြင်စစ်ရေး - ဂွမြို့ကို ပြန်လည်ဝင်ရောက်ရန် ကြိုးပမ်းနေသည့် စစ်ကောင်စီတပ်နှင့် AA တို့ သာပေါင်းနှင့် ရေကြည်မြို့နယ်တို့တွင် နှစ်ရက်ဆက် တိုက်ပွဲဖြစ်ပွား၊ စစ်တပ်ဆုတ်ခွာရပြီး လက်နက်များ သိမ်းဆည်းရမိ။ မကွေးတိုင်း မြိုင်မြို့နယ်၊ ယာကြီးပြင်ကျေးရွာရှိ ပြည်သူ့နေအိမ်များကို စစ်ကောင်စီတပ် မီးရှို့ဖျက်ဆီး။ အရပ်သားများ သတ်ဖြတ်ခံရမှု - ချောင်းဦးမြို့နယ် ခင်မွန်ကျေးရွာတွင် အရက်မူးနေသည့် စစ်ကောင်စီတပ်က စိတ်ကျန်းမာရေးမကောင်းသူတစ်ဦးကို အကြောင်းမဲ့ ပစ်သတ်။ ရသေ့တောင်မြို့နယ် နံ့သာကျွန်းအနီး ငါးဖမ်းထွက်သည့် စစ်ဘေးရှောင် (၁၁) ဦးကို စစ်တပ်က ပစ်ခတ်၍ (၁) ဦးသေဆုံးပြီး (၂) ဦး ဒဏ်ရာရကာ လှေများ လုယက်ခံရ။ သဘာဝဘေးနှင့် နိုင်ငံတကာ သတင်းများ သဘာဝဘေး - မိုးကုတ်မြို့တွင် မြေပြိုမှုကြောင့် နေအိမ်များပျက်စီးပြီး လူထိခိုက်မှုရှိ၊ ဖားကန့်မြို့ ဆိုင်းတောင်အုပ်စုတွင် စည်းကမ်းမဲ့မြေစာများကြောင့် ရေကြီးကာ နေအိမ် (၁၅) လုံးခန့် ရေဝင်ပျက်စီး။ ဟုမ္မလင်းမြို့နယ် နမ့်တောကျေးရွာတွင် ဥရုချောင်းရေ လျှံတက်၍ ဆေးရုံနှင့် စာသင်ကျောင်းများ ရေနစ်မြှုပ်။ ယူကရိန်း - ခါဆွန်မြို့တွင် ဟင်းသီးဟင်းရွက် ရောင်းချသူကို ဒရုန်းဖြင့် အနီးကပ်တိုက်ခိုက်မှုအပေါ် ရုရှားအား စစ်ရာဇဝတ်မှုကျူးလွန်ကြောင်း ယူကရိန်းစွပ်စွဲ။ ထိုင်းနိုင်ငံ မှုခင်း/ဖြစ်စဉ် - မဲဆောက်တွင် ဘတ် (၂) ဘီလီယံကျော် ငွေကြေးခဝါချသည့် အမျိုးသမီးကို ဖမ်းဆီးရမိ။ နရသီဝပ်ခရိုင်တွင် ဘောလုံးကစားနေစဉ် မိုးကြိုးပစ်ခံရ၍ Yala FC ကစားသမားတစ်ဦး သေဆုံးကာ (၉) ဦး ဒဏ်ရာရ။ လေကြောင်းမတော်တဆမှု - ဖူးကက်မှ ဒေလီသို့ ပျံသန်းလာသည့် Air India လေယာဉ် ပြင်းထန်လေတုန်ခါမှုကြောင့် ပေ (၃၀၀) ခန့် ရုတ်တရက်ကျဆင်းခဲ့ပြီး (၁၄) ဦး ဒဏ်ရာရ။ တောင်ကိုရီးယား - ဆိုးလ်မြို့တော်နှင့် ပတ်ဝန်းကျင်ဒေသများ၏ ၄၃ ရာခိုင်နှုန်းတွင် အမြင့်ဆုံးအဆင့် အပူလှိုင်းသတိပေးချက် ထုတ်ပြန်၊ အပူဒဏ်ကြောင့် နိုင်ငံတစ်ဝန်း လူ (၁၉) ဦး သေဆုံးထား။ ပိုမိုစုံလင်သော သတင်းများကို အောက်ပါလင့်ခ်များတွင် ဆက်လက်ဖတ်ရှု နားဆင်နိုင်ပါသည် - Website: www.thehorizonsnews.com နေ့စဉ် နောက်ဆုံးရသတင်းများကို အချိန်နှင့်တပြေးညီ သိရှိနိုင်ရန် Facebook, YouTube, Telegram နှင့် TikTok တို့တွင် Horizons News ကို Follow လုပ်ထားရန် ဖိတ်ခေါ်အပ်ပါသည်။

Horizons News ရဲ့ “တော်လှန် ညချမ်း တေးသံစဉ်” ဂီတအစီအစဉ် တောတောင်တွေထဲမှာ အေးစက်တဲ့ညတွေကို ကြံ့ကြံ့ခံဖြတ်သန်းရင်း ရှေ့တန်းကနေ အသက်သွေးချွေး ပေးဆပ်တိုက်ပွဲဝင်နေကြတဲ့ သူရဲကောင်းရဲဘော်များအတွက် ညချမ်းတိုင်းမှာ ဂီတနဲ့ ခွန်အားပြန်လည်ဖြည့်တင်းပေးမယ့် “တော်လှန် ညချမ်း တေးသံစဉ်” အစီအစဉ်ကို အပတ်စဉ် ဗုဒ္ဓဟူးနေ့ ညချမ်းတိုင်းမှာ ထုတ်လွှင့်တင်ဆက်ပေးနေပြီဖြစ်ပါတယ်။ ဒီတစ်ပတ်ညချမ်းမှာတော့ “ဘီလူးဆိုင်းနဲ့ပူဇော်ခြင်း” ဆိုတဲ့ သီချင်းကောင်းလေးကို အထူးရွေးချယ် တင်ဆက်ပေးသွားမှာ ဖြစ်ပါတယ်။ ရဲဘော်တို့အနေနဲ့ နားဆင်ချင်တဲ့ သီချင်းတွေပဲဖြစ်ဖြစ်၊ မိမိတို့ရဲ့ ရဲဘော်ရဲဘက်တွေဆီ ပေးပို့ချင်တဲ့ သတင်းစကားတွေပဲဖြစ်ဖြစ် ရှိရင်လည်း Horizons News ရဲ့ Telegram Channel လင့်ခ်ဖြစ်တဲ့ https://t.me/thehorizonsnew ကနေတစ်ဆင့် လုံခြုံစိတ်ချစွာ တိုက်ရိုက်ဆက်သွယ်ပေးပို့ တောင်းဆိုနိုင်ပါတယ်။ လာမယ့် ဗုဒ္ဓဟူးနေ့ ညချမ်းမှာ လည်း ဘယ်သီချင်းနဲ့ ဖျော်ဖြေအုံးမလဲဆိုတာ အားလုံးပဲ စောင့်မျှော်နားဆင်အားပေးကြဖို့ ဖိတ်ခေါ်လိုက်ရပါတယ်။ #HorizonsNews #တော်လှန်ညချမ်းတေးသံစဉ် #ဘီလူးဆိုင်းနဲ့ပူဇော်ခြင်း #Cover "Disclaimer: No Copyright Infringement Intended. All rights and credits to the original music, lyrics, and composition belong directly to their rightful owners. This cover is created strictly for non-profit, educational, and revolutionary awareness purposes. We do not own the rights to the original song.” Singer - Lynn Lynn Lyric - Lynn Lynn Original Song Link - https://www.youtube.com/watch?v=ovpXCLk26Sc&list=RDovpXCLk26Sc&start_radio=1

ဆားလင်းကြီး၊ ပလောင်ရွာအနီးရှိ စစ်ကောင်စီ စစ်သင်္ဘောနှင့် ဖလပ်တွဲများကို တော်လှန်ရေး ပူးပေါင်းတပ်ဖွဲ့များ တိုက်ခိုက် ဆားလင်းကြီး ၊ ဩဂုတ် ၅ ၊ Horizons မကွေးတိုင်းနှင့် စစ်ကိုင်းတိုင်းအစပ် ချင်းတွင်းမြစ်အတိုင်း စုန်ဆင်းလာသည့် စစ်ကောင်စီ၏ စစ်သင်္ဘောနှင့် ကြေးနီတင် ဖလပ်တွဲများကို ရှေ့ထွက်မိုင်းများ၊ လက်နက်ငယ်များ အသုံးပြု၍ မိုင်းဆွဲတိုက်ခိုက်ခဲ့ကြောင်း Chindwin Fighter Group (C.F.G) က ယနေ့ ဩဂုတ်လ (၅) ရက်နေ့တွင် သတင်းထုတ်ပြန်လိုက်သည်။ ဖြစ်စဉ်မှာ ပြီးခဲ့သည့် ဩဂုတ်လ (၄) ရက်နေ့ ညနေ ၄ နာရီဝန်းကျင်ခန့်တွင် ဝမ်ပေါင်ကုမ္ပဏီမှ ကြေးနီများ တင်ဆောင်၍ ချင်းတွင်းမြစ်အတိုင်း အောက်ဘက်သို့ စုန်ဆင်းလာသည့် စစ်ကောင်စီ၏ ဖလပ်တွဲတွန်း (၁၅) စီးနှင့် စစ်သင်္ဘော (၁) စီးအနက် ပလောင်ကျေးရွာအနီး၌ သောင်တင်ကျန်ရစ်ခဲ့သော ဖလပ်တွဲ (၂) စီးနှင့် စစ်သင်္ဘော (၁) စီးတို့ကို တော်လှန်ရေး ပူးပေါင်းတပ်ဖွဲ့များက သွားရောက် တိုက်ခိုက်ခဲ့ခြင်းဖြစ်သည်။ အဆိုပါ တိုက်ခိုက်မှုကို Chindwin Fighter Group (C.F.G)၊ Brave Heart Army (BHA) နှင့် Monywa Dynamite (STF) တော်လှန်ရေးတပ်ဖွဲ့များ ပူးပေါင်း၍ ဆောင်ရွက်ခဲ့ကြခြင်းဖြစ်သည်။ သောင်တင်နေသည့် စစ်သင်္ဘောနှင့် ဖလပ်တွဲများကို ရှေ့ထွက်ပြောင်းတိုက်မိုင်း (၃) လုံးပါဝင်သော ပွိုင့် (၂) ပွိုင့်ဖြင့် ဖောက်ခွဲတိုက်ခိုက်ခဲ့သည့်အပြင် လက်နက်ငယ်များဖြင့်ပါ အပြန်အလှန် ပစ်ခတ်တိုက်ခိုက်ခဲ့ကြောင်း သိရသည်။ ယင်းသို့ တိုက်ခိုက်ခံရမှုကြောင့် စစ်ကောင်စီတပ်ဘက်မှ လက်နက်ကြီး၊ လက်နက်ငယ်များဖြင့် ပြန်လည်ပစ်ခတ်မှုများ ရှိခဲ့သော်လည်း တော်လှန်ရေး ပူးပေါင်းတပ်ဖွဲ့ဝင် ရဲဘော်များအားလုံး ဘေးကင်းစွာ ပြန်လည်ဆုတ်ခွာနိုင်ခဲ့ကြောင်း ထုတ်ပြန်ချက်တွင် ဖော်ပြထားသည်။ ဝမ်ပေါင် ကြေးနီစီမံကိန်းမှ ထွက်ရှိသည့် စီးပွားရေးအရ အရေးပါသော ကြေးနီများကို စစ်ကောင်စီက မြစ်ကြောင်းအတိုင်း စစ်သင်္ဘောများ၊ လက်နက်ကိုင်တပ်ဖွဲ့များဖြင့် အကာအကွယ်ယူကာ သယ်ယူပို့ဆောင်လျက်ရှိသည်။ ယခုကဲ့သို့ စစ်ကောင်စီ၏ ရေကြောင်းပို့ဆောင်ရေး လမ်းကြောင်းများကို တော်လှန်ရေး ဒေသခံတပ်ဖွဲ့များက မကြာခဏ ကြားဖြတ်တိုက်ခိုက်လျက်ရှိရာ စစ်ကောင်စီ၏ စီးပွားရေးနှင့် ထောက်ပံ့ရေး လမ်းကြောင်းများ ထိခိုက်မှုရှိနေပြီး မြစ်ကြောင်းတစ်လျှောက် လုံခြုံရေး ပိုမိုတင်းကျပ်လာနိုင်သည့် အခြေအနေများ ရှိနေကြောင်း သုံးသပ်ရပါသည်။ #ဆားလင်းကြီး #ချင်းတွင်းမြစ် #ဝမ်ပေါင်ကြေးနီ #CFG #BHA #STF #Horizons

နမ့်တောကျေးရွာတွင် ဥရုချောင်းရေ လျှံတက်မှုကြောင့် တိုက်နယ်ဆေးရုံနှင့် စာသင်ကျောင်းများ ရေနစ်မြှုပ် ဟုမ္မလင်း ၊ ဩဂုတ် ၅ ၊ Horizons စစ်ကိုင်းတိုင်းဒေသကြီး၊ ဟုမ္မလင်းမြို့နယ်၊ နမ့်တောကျေးရွာတွင် ပြီးခဲ့သည့် ဩဂုတ်လ (၄) ရက်နေ့ ညနေပိုင်းက ဥရုချောင်းရေ ရုတ်တရက် လျှံတက်လာမှုကြောင့် ဒေသတွင်းရှိ တိုက်နယ်ဆေးရုံ၊ စာသင်ကျောင်းများနှင့် ကျေးရွာတွင်း လမ်းမကြီးများ ရေနစ်မြှုပ်ခဲ့ကြောင်း ဒေသခံများထံမှ သိရသည်။ ဩဂုတ်လ (၄) ရက်နေ့ ညနေပိုင်းအချိန်မှစတင်၍ ဥရုချောင်းရေသည် ရုတ်တရက် လျှံတက်လာခဲ့ခြင်းဖြစ်သည်။ ယင်းသို့ ရေလျှံတက်လာမှုကြောင့် ရွာတွင်းလမ်းမကြီးများပေါ်သို့ ရေများစီးဝင်လာခဲ့ပြီး အရေးပါသည့် အဆောက်အအုံများနှင့် စာသင်ကျောင်းများအတွင်းသို့ ရေများ အလျင်အမြန် ဝင်ရောက်နစ်မြှုပ်ခဲ့ခြင်းဖြစ်ကြောင်း သိရသည်။ ယခုကဲ့သို့ ကျေးရွာတွင်း လမ်းမကြီးများ ရေနစ်မြှုပ်သွားသည့်အတွက် ဒေသခံပြည်သူများအနေဖြင့် သွားလာရေး အခက်အခဲများနှင့် ဆိုးရွားစွာ ရင်ဆိုင်နေရသည်။ ထို့ပြင် တိုက်နယ်ဆေးရုံနှင့် စာသင်ကျောင်းများအတွင်းသို့ပါ ရေဝင်ရောက်ခဲ့သဖြင့် ကျန်းမာရေး ဝန်ဆောင်မှုပေးခြင်းများနှင့် ပညာရေးလုပ်ငန်းစဉ်များပါ ကာလတို ခေတ္တရပ်ဆိုင်းထားရမည့် အခြေအနေမျိုး ဖြစ်ပေါ်နေကြောင်း သိရသည်။ မိုးရာသီကာလအတွင်း စစ်ကိုင်းတိုင်း အထက်ပိုင်းဒေသများရှိ မြစ်ချောင်းများ ရေလျှံတက်ခြင်းကို နှစ်စဉ်ကြုံတွေ့ရလေ့ရှိသည်။ သို့သော်လည်း ယခုကဲ့သို့ ဒေသတွင်း အဓိကအားထားရသည့် ကျန်းမာရေးနှင့် ပညာရေး အဆောက်အအုံများပါ ရေနစ်မြှုပ်ခြင်းသည် ပြည်သူများ၏ လူမှုစီးပွားဘဝနှင့် အရေးပေါ် ကျန်းမာရေး စောင့်ရှောက်မှုများအတွက် များစွာခက်ခဲမှုများ ဖြစ်ပေါ်စေလျက်ရှိသည်။ #စစ်ကိုင်းတိုင်း #ဟုမ္မလင်းမြို့နယ် #နမ့်တောကျေးရွာ #ဥရုချောင်း #ရေကြီးရေလျှံမှု #Horizons