သန့်ရှင်းတဲ့ရေမရလို့ စစ်ဘေးရှောင်ထောင်ချီ ယားနာ ကူးစက်နေ

ကရင်နီက စာသင်ကျောင်းတချို့မှာလည်း ကလေးတွေ အရေပြားရောဂါ ခံစားနေကြရပါတယ်။

မကွေးတိုင်းထဲက ပေါက်မြို့နယ်က စစ်ဘေးရှောင်ထောင်ချီ ယားနာ ကူးစက်ခံနေရပါတယ်။

လသားကလေးငယ်တွေအပါအဝင် စစ်ဘေးရှောင်အရွယ်သုံးပါးလုံး ယားနာကူးစက်ခံနေရတဲ့ အခြေအနေပါ။

ဒီအခြေအနေက အညာမှာတင်မဟုတ်ဘဲ ကရင်နီ(ကယား) မှာလည်းဖြစ်နေတာပါ။

ဒါ့ကြောင့် အဲဒီမြို့နယ်တွေမှာ ဆေးကုသပေးနေတဲ့ ကျန်းမာရေးဝန်ထမ်းတွေရဲ့ တူညီတဲ့ စကားကတော့ "Outbreaks" ဖြစ်နေပြီဆိုတာပါပဲ။

နိုင်ငံသာ တည်ငြိမ်နေရင်တော့ ဒီလိုဖြစ်ပွားနေတဲ့ ရောဂါတွေကို ရောဂါကာကွယ်နှိမ်နှင်းရေး စီမံချက်တွေချမှတ်ပြီး ခပ်မြန်မြန် ဆောင်ရွက်ကြရမှာ ဖြစ်ပေမဲ့ လက်ရှိအချိန်မှာတော့ နိုင်သလောက်ကုသနေရတဲ့ အခြေအနေတွေပါ။

ကလေးမှသည် လူကြီးအထိ အစုအလိုက်အပြုံလိုက် ကူးစက်နေတဲ့ ရောဂါ

"ကလေးကို သေချာထုတ်ပိုး၊ ချီပွေ့လာပြီး ကိုယ့်ရှေ့ရောက်လို့ အထုတ်လည်းဖြည်လိုက်ရော ကလေးမှာ တကိုယ်လုံး အနာကျက်ခဲတွေဖြစ်နေတာ။ တချို့ကလေးတွေဆို အနာစိုပြီး အရည်တွေကျနေတာ" လို့ ကရင်နီပြည်နယ်မှာ စေတနာ့ဝန်ထမ်း ဆေးကုပေးနေတဲ့ ဆရာဝန်က သူမျက်မြင်ကြုံတွေ့ရတာကို ပြောပါတယ်။

ကလေးမှာ ယားနာဖြစ်လို့ လူကြီးကို ကြည့်လိုက်ရင်လည်း ယားနာနဲ့ မကင်း ဖြစ်နေကြပါတယ်။

ကရင်နီ (ကယား) ပြည်နယ်၊ ဒီမောဆိုးမြို့နယ်နဲ့ ရှားတောမြို့နယ်ထဲက စစ်ဘေးရှောင်စခန်းနဲ့ ကျောင်းတွေမှာ ကလေးတွေဟာ အရေပြားရောဂါ အစုလိုက်အပြုံလိုက် ရောဂါကူးစက် (Outbreaks)နေတယ်လို့ ကရင်နီ အရေးပေါ် ကယ်ဆယ်ရေး၊ ပူးပေါင်းညှိနှိုင်းရေးအဖွဲ့ က ၂၀၂၅ ခုနှစ် ဒီဇင်ဘာမှာရော၊ ၂၀၂၆ ခုနှစ် ဇန်နဝါရီ ၂၇ ရက်မှာပါ ထုတ်ပြန်ထားပါတယ်။