ONE 158 ပြိုင်ပွဲတွင် ရင်ခုန်စိတ်လှုပ်ရှားဖွယ် တွေ့မြင်ရမည့် ကျော်စွာဝင်းနှင့် စလာတန်တို့၏ ပွဲစဉ်အကြို သုံးသပ်ချက်

ဇွန် ၇ ၊ Horizons

လာမဲ့ ဇွန် ၁၂ ရက်နေ့တွင် ကျင်းပမည့် ONE 158 ပြိုင်ပွဲကြီးတွင် ယှဉ်ပြိုင်ထိုးသတ်ကြမည့် မြန်မာ့ရိုးရာလက်ဝှေ့ကျော် ကျော်စွာဝင်းနှင့် ထိုင်းဖိုက်တာ စလာတန်တို့၏ ပွဲစဉ်မှာ ပရိသတ်များအတွက် တကယ့်ကို စိတ်လှုပ်ရှားစရာ ပွဲကောင်းတစ်ပွဲ ဖြစ်လာဖွယ်ရှိနေပါသည်။

 ပွဲစဉ်အကြို သုံးသပ်ချက်များအရ ကျော်စွာဝင်းအနေဖြင့် ပွဲစတင်သည်နှင့် တစ်ပြိုင်နက် မြန်မာ့လက်ဝှေ့၏ ထုံးစံအတိုင်း ပြင်းထန်သော ထိုးချက်များ၊ အဖျက်စွမ်းအားကောင်းမွန်မှုတို့ဖြင့် ပြိုင်ဘက်ကို အဆက်မပြတ် ဖိအားပေးလာဖွယ်ရှိသည်။

အထူးသဖြင့် လျင်မြန်ပြင်းထန်သော လက်သီးကောင်တာများနှင့် ဒူးပျံတိုက်စစ်များကို အသုံးပြုကာ ပွဲကို အမြန်ဆုံး အဆုံးသတ်နိုင်ရန် ဗျူဟာခင်းကျင်းလာမည်ဟု ခန့်မှန်းရသည်။

တဖက်တွင်လည်း အတွေ့အကြုံရင့် ထိုင်းဖိုက်တာ စလာတန်အနေဖြင့် တည်တည်ငြိမ်ငြိမ်ဖြင့် တုံ့ပြန်လာနိုင်ပြီး၊ ကျော်စွာဝင်း၏ ဝင်လုံးတိုက်စစ်များကို အသာစီးရယူကာ ၎င်း၏ အားသာချက်ဖြစ်သော ဒူးချက်များ၊ တံတောင်ချက်များဖြင့် ပွဲကို ပြန်လည်ထိန်းချုပ်ရန် ကြိုးပမ်းလာမည်ဖြစ်သည်။

ပွဲအစပိုင်းတွင် ကျော်စွာဝင်း၏ လျင်မြန်ပြင်းထန်သော လက်သီးချက်များကြောင့် စလာတန်အနေဖြင့် အနည်းငယ် ရုန်းကန်ရနိုင်ပြီး ပရိသတ်အကြိုက် တွေ့မြင်ရမည်ဖြစ်သည်။

သို့သော်လည်း ပွဲချိန်ကြာလာသည်နှင့်အမျှ စလာတန်၏ ရိုက်ချက်များ ပိုမိုထိရောက်လာနိုင်ကာ၊ အထူးသဖြင့် ကပ်လုံး တိုက်ပွဲများတွင် စလာတန်၏ ဒူးချက်များကို ခုခံရန် ကျော်စွာဝင်းအနေဖြင့် ရုန်းကန်ရဖွယ်ရှိပြီး စလာတန်၏ ကစားကွက် အေးဆေးမှုနှင့် အတွေ့အကြုံက ပွဲအလယ်ပိုင်းမှစ၍ သိသိသာသာ အသာစီးရရှိသွားနိုင်သည့် အခြေအနေများလည်း ရှိနေသည်။

ကျော်စွာဝင်း၏ အဓိက အားသာချက်မှာ စိတ်ဓာတ်ပြင်းပြမှု၊ ပေါက်ကွဲအားကောင်းသော တိုက်စစ်နှင့် မည်သည့်အခြေအနေတွင်မဆို အရှုံးမပေးဘဲ တွန်းလှန်လိုသည့် စိတ်ဓာတ်ပင်ဖြစ်သည်။

သို့သော်လည်း ONE Championship ၏ စည်းမျဉ်းများအောက်တွင် မွေထိုင်းပုံစံ ကပ်လုံး တွန်းလှန်မှုနှင့် ဘောဒီကန်ချက်များကို ကာကွယ်သည့်နေရာတို့တွင် အနည်းငယ် အားနည်းချက်ရှိခဲ့ဖူးရာ ယခုပွဲတွင် စလာတန်အား အမှတ်လွယ်လွယ်မပေးရအောင် အထူးသတိပြုရန် လိုအပ်မည်ဖြစ်သည်။

ခြုံငုံသုံးသပ်ရလျှင် နိုင်ငံတကာစင်မြင့်တွင် မိမိ၏ သတ္တိနှင့် ထိုးသတ်နိုင်စွမ်းကို သက်သေပြထားပြီးဖြစ်သော ကျော်စွာဝင်းအနေဖြင့် အမှတ်ပေးစည်းမျဉ်းနှင့် အတွေ့အကြုံပိုင်း ပိုမိုရင့်ကျက်သည့် စလာတန်၏ ထိန်းချုပ်ကစားမှုကို ကျော်ဖြတ်နိုင်ရန်အတွက် ခန္ဓာကိုယ်ကြံ့ခိုင်မှုနှင့် ကပ်လုံးကာကွယ်ရေးပိုင်းကို ပိုမိုဖြည့်တင်းကာ ယခုပွဲစဉ်တွင် အမှားအယွင်းမခံဘဲ သေချာစွာ ချဉ်းကပ်ထိုးသတ်သွားရန် လိုအပ်မည်ဖြစ်ကြောင်း သုံးသပ်တင်ပြအပ်ပါသည်။