နောက်ကျသွင်းဂိုးများဖြင့် အင်္ဂလန်ကို (၂-၁) ဂိုးဖြင့် အနိုင်ယူကာ လက်ရှိချန်ပီယံ အာဂျင်တီးနား ဗိုလ်လုပွဲသို့ တက်လှမ်း

အတ္တလန်တာ ၊ ဇူလိုင် ၁၆ ၊ Horizons

ဇူလိုင်လ ၁၅ ရက်နေ့က အတ္တလန်တာကွင်းတွင် ယှဉ်ပြိုင်ကစားခဲ့သော ၂၀၂၆ ကမ္ဘာ့ဖလား ဆီမီးဖိုင်နယ် ပွဲစဉ်တွင် လက်ရှိချန်ပီယံ အာဂျင်တီးနားအသင်းသည် ရှုံးနိမ့်လုနီးပါး အခြေအနေမှ နောက်ကျချေပဂိုးနှင့် အနိုင်ဂိုးများ သွင်းယူကာ အင်္ဂလန်အသင်းကို (၂-၁) ဂိုးဖြင့် အနိုင်ယူပြီး ဗိုလ်လုပွဲသို့ တက်ရောက်သွားပြီ ဖြစ်သည်။

 ဗိုလ်လုပွဲစဉ်အဖြစ် လာမည့် တနင်္ဂနွေနေ့တွင် နယူးယောက် (နယူးဂျာစီ) ၌ စပိန်အသင်းနှင့် ယှဉ်ပြိုင်ကစားရမည် ဖြစ်သည်။

ပထမပိုင်းတွင် နှစ်သင်းစလုံး အကြိတ်အနယ်ရှိခဲ့ပြီး ဂိုးမရှိ သရေရလဒ်ဖြင့်သာ ပြီးဆုံးခဲ့သည်။ ဒုတိယပိုင်း ပွဲချိန် ၅၅ မိနစ်တွင် မော်ဂန် ရော်ဂျာ၏ ဖြတ်တင်ဘောမှတစ်ဆင့် အန်သိုနီ ဂေါ်ဒွန်က အင်္ဂလန်အသင်းအတွက် ဦးဆောင်ဂိုးကို သွင်းယူပေးခဲ့သည်။ 

နှစ်ပေါင်း ၆၀ အတွင်း ပထမဆုံးအကြိမ် ကမ္ဘာ့ဖလား ဗိုလ်လုပွဲတက်ရန် နီးစပ်ခဲ့သည့် အင်္ဂလန်အသင်း၏ မျှော်လင့်ချက်များကို အာဂျင်တီးနားအသင်းက ပွဲချိန်နှောင်းပိုင်းမှသာ ချေဖျက်ပစ်နိုင်ခဲ့သည်။

ပွဲချိန် ၈၅ မိနစ်တွင် အန်ဇို ဖာနန်ဒက်ဇ်က အဝေးကန်ချက်ဖြင့် ချေပဂိုးကို လည်းကောင်း၊ နာကျင်အချိန်ပို (၉၀+၂) မိနစ်တွင် လူစားဝင်ကစားသမား လော်တာရို မာတီနက်ဇ်က အနိုင်ဂိုးကို လည်းကောင်း အသီးသီး သွင်းယူပေးခဲ့သည်။ 

အဆိုပါ သွင်းဂိုးနှစ်ဂိုးစလုံးကို အကောင်းဆုံးကစားသမားဆုရရှိခဲ့သည့် အသင်းခေါင်းဆောင် လီယွန်နယ် မက်ဆီက ဖန်တီးပေးခဲ့ခြင်း ဖြစ်သည်။

ယခုပွဲစဉ်တွင် အသက် ၃၉ နှစ်နှင့် ၂၁ ရက်ရှိပြီဖြစ်သော မက်ဆီသည် ကမ္ဘာ့ဖလား ဆီမီးဖိုင်နယ်သမိုင်းတစ်လျှောက် ဝင်ရောက်ကစားခဲ့သည့် အသက်အကြီးဆုံး ကွင်းတွင်းကစားသမားအဖြစ် စံချိန်သစ်တင်နိုင်ခဲ့သလို အင်္ဂလန်အသင်းခေါင်းဆောင် ဟယ်ရီကိန်းသည်လည်း နိုင်ငံအသင်းအတွက် ၁၂၁ ပွဲမြောက် ပါဝင်ကစားပေးခဲ့ပြီး အင်္ဂလန်အသင်းသမိုင်းတွင် ပွဲအများဆုံး ကစားပေးသည့် ကွင်းတွင်းကစားသမား ဖြစ်လာခဲ့သည်။ 

ထို့ပြင် အာဂျင်တီးနား တိုက်စစ်မှူး မာတီနက်ဇ်သည် ကွာတားဖိုင်နယ်နှင့် ဆီမီးဖိုင်နယ် နှစ်ပွဲဆက်တိုက် လူစားဝင်ကစားသမားအဖြစ် ဝင်ရောက်ကာ အနိုင်ဂိုးများ သွင်းယူပေးနိုင်ခဲ့ကြောင်း သိရသည်။

ပွဲအပြီးတွင် အာဂျင်တီးနားအသင်းနည်းပြ လီယွန်နယ် စကာလိုနီက မိမိတို့အသင်းသည် အမြဲအံ့သြစေပြီး ထူးခြားသည့်အသင်းဖြစ်ကြောင်း ချီးကျူးခဲ့သလို အနိုင်ဂိုးရှင် မာတီနက်ဇ်ကလည်း ပွဲချိန် ၆၀ မိနစ်ခန့်အထိ အင်္ဂလန်က ဖိကစားသွားနိုင်သော်လည်း နောက်ပိုင်းတွင် ပင်ပန်းသွားခဲ့ပြီး မိမိတို့အသင်းက စိတ်အေးအေးထားကာ အနိုင်ယူနိုင်ခဲ့ကြောင်း ပြောဆိုသည်။

အင်္ဂလန်အသင်း နည်းပြ သောမတ်စ် တူခယ်ကမူ ဂိုးရပြီးနောက် ကစားပုံလျော့ရဲသွားကာ ဘောလုံးပိုင်ဆိုင်မှု အသာမယူနိုင်တော့ကြောင်း ဝန်ခံခဲ့ပြီး အသင်းခေါင်းဆောင် ဟယ်ရီကိန်းကလည်း ဦးဆောင်နေချိန်တွင် ရလဒ်ကိုသာ ထိန်းရန် ကြိုးစားခဲ့မိခြင်းက ယခုလိုအဆင့်တွင် မလုံလောက်ကြောင်းနှင့် ရှုံးနိမ့်မှုအတွက် အလွန်စိတ်ပျက်မိကြောင်း ပြောကြားခဲ့သည်။