ONE Championship 158 ပြိုင်ပွဲတွင် ထိုင်းဖိုက်တာ ဇလာတန်ကို အမှတ်ဖြင့် အနိုင်ရခဲ့သည့် ကျော်စွာဝင်း၏ ပွဲအပေါ် သုံးသပ်ချက်

ရန်ကုန်၊ ဇွန် ၁၃ ၊ Horizons

ONE Championship 158 ပြိုင်ပွဲတွင် မြန်မာဖိုက်တာ ကျော်စွာဝင်းသည် ထိုင်းဖိုက်တာ ဇလာတန်ကို အမှတ်ဖြင့် အနိုင်ရရှိခဲ့ပြီး ပထမအချီမှစ၍ အသာစီးရယူကာ တတိယအချီတွင် အနိုင်ရရန် သေချာသလောက်ဖြစ်ခဲ့သည်။

၎င်း၏ ကာယပိုင်းဆိုင်ရာ ကြံ့ခိုင်မှုပြင်ဆင်လာခြင်းနှင့် နည်းဗျူဟာပိုင်း စည်းကမ်းရှိမှု (Tactical Discipline) များမှာ အပြစ်ဆိုစရာမရှိအောင် ကောင်းမွန်ခဲ့သော်လည်း၊ အနိုင်သေချာနေသည့် အခြေအနေမျိုးတွင် အန္တရာယ်များသော အနီးကပ်ဆိုင်ထိုး၊ ဆိုင်ရိုက်ခြင်းများကို စွန့်စားပြုလုပ်ခဲ့ခြင်းအပေါ် အားကစားသုံးသပ်သူများက စိုးရိမ်မှုများရှိနေကြသည်။

ပြိုင်ဘက်က အားပြုဝင်ရိုက်ချိန်တွင် လမ်းကြောင်းတိုပြီး မြန်ဆန်သောကြောင့် မထင်မှတ်ဘဲ ထိမှန်သွားနိုင်သဖြင့် မိမိဘက်က အပြတ်အသတ် အသာစီးရနေချိန်တွင် ၅၀-၅၀ စွန့်စားရသည့် အခြေအနေမျိုး မဖန်တီးသင့်ဘဲ၊ ဘောလုံးပွဲများကဲ့သို့ပင် ပွဲအခြေအနေ (Game State) ကိုကြည့်၍ တွန်းလွှတ်ခြင်း၊ ဆွဲကပ်ခြင်းနှင့် အတိုက်အခံကို မျှတအောင်ကစားကာ ဦးနှောက်သုံး၍ အေးအေးဆေးဆေး ထိန်းချုပ်ကစားသင့်ကြောင်း ထောက်ပြထားသည်။

ယခုကဲ့သို့ ထောက်ပြရခြင်းမှာ ကျော်စွာဝင်းကို အမြဲတမ်း အနိုင်ရစေချင်ပြီး ပိုမိုရင့်ကျက်သည့် ကစားသမားတစ်ဦး ဖြစ်လာစေလိုသည့် စေတနာကြောင့်ဖြစ်ကာ၊ နောင်လာမည့်ပွဲစဉ်များတွင် ပိုမိုကောင်းမွန်သည့် ပွဲစီမံခန့်ခွဲမှု (Game Management) များဖြင့် အောင်ပွဲများ ဆက်လက်ရယူနိုင်မည်ဟု ယုံကြည်ရပြီး ပရိသတ်များအနေဖြင့်လည်း ယခုပွဲစဉ်ပါ ကစားပုံအပေါ် ၎င်းတို့၏ အမြင်များကို ဝင်ရောက်မျှဝေဆွေးနွေးနိုင်ကြောင်း ဖော်ပြထားသည်။