UFC Freedom 250 ဒုတိယခေါင်ပွဲတွင် အဲလက်စ် ပရဲရား၏ သမိုင်းဝင်အိပ်မက်ကို ရိုက်ချိုးကာ စီရယ်လ်ဂိန်း အနိုင်ရရှိ

ဝါရှင်တန် ၊ ဇွန် ၁၅ ၊ Horizons

UFC Freedom 250 ပြိုင်ပွဲကြီး၏ ဒုတိယခေါင်ပွဲစဉ် (Co-Main Event) တွင် ပြင်သစ်ဖိုက်တာ စီရယ်လ်ဂိန်း (Ciryl Gane) က ဘရာဇီးစတား အဲလက်စ် ပရဲရား (Alex Pereira) ကို အနိုင်ယူကာ ကြီးမားသည့် စွမ်းဆောင်ရည်ကို ထုတ်ပြနိုင်ခဲ့သည်။

 ယခုရှုံးနိမ့်မှုကြောင့် UFC သမိုင်းတစ်လျှောက် ဝိတ်တန်း (၃) ခုတွင် ချန်ပီယံဖြစ်လာမည့် ပရဲရား၏ ကြီးကျယ်ခမ်းနားသော အိပ်မက်မှာလည်း ဤပွဲတွင်ပင် ရပ်တန့်သွားခဲ့ရသည်။

ပွဲစတင်ချိန်မှစ၍ စီရယ်လ်ဂိန်းသည် ၎င်း၏ အဓိကအားသာချက်များဖြစ်သော လျင်မြန်သည့် ခြေလှမ်းရွှေ့ပြောင်းမှုများ၊ အကွာအဝေး အကောင်းဆုံးထိန်းချုပ်နိုင်စွမ်းနှင့် တိကျသော ထိုးချက်များကို အသုံးချကာ ပရဲရားကို အသာစီးမှ ဖိအားပေးနိုင်ခဲ့သည်။ 

ပရဲရားအနေဖြင့် ၎င်း၏ အန္တရာယ်အပေးနိုင်ဆုံး လက်နက်ဖြစ်သည့် ဘယ်လက်သီးကို အသုံးပြုရန် ကြိုးစားခဲ့သော်လည်း ဂိန်း၏ လျင်မြန်သော လှုပ်ရှားမှုများကြောင့် ထိရောက်သည့် အခွင့်အရေးများ မရရှိခဲ့ပေ။

ပွဲလယ်ပိုင်းသို့ ရောက်ရှိလာချိန်တွင် ဂိန်းက တိုက်စစ်အရှိန်ကို ပိုမိုမြှင့်တင်လာခဲ့ပြီး ပြင်းထန်သော တွဲလုံးထိုးချက်များဖြင့် ပရဲရားကို ထိခိုက်စေခဲ့သည်။ 

နောက်ဆုံးတွင် ပြင်သစ်သားက အပြင်းအထန် တိုက်စစ်ဆင်ကာ TKO ဖြင့် ပွဲကို အပြီးသတ် အနိုင်ယူသွားခဲ့သည်။

ယခုနိုင်ပွဲသည် စီရယ်လ်ဂိန်းအတွက် Heavyweight ဝိတ်တန်းတွင် ၎င်း၏ ထိပ်တန်းအရည်အသွေးကို ထပ်မံသက်သေပြနိုင်ခဲ့သည့် ပွဲတစ်ပွဲဖြစ်လာခဲ့သည်။ 

အခြားတစ်ဖက်တွင်မူ အဲလက်စ် ပရဲရားအတွက် Heavyweight တန်းသို့ ပထမဆုံးအကြိမ် တက်ရောက်စိန်ခေါ်သည့်ပွဲ၌ပင် ကြီးမားခက်ခဲသော သင်ခန်းစာတစ်ခုကို ရရှိသွားခဲ့သည်။