ကမ္ဘာ့ဖလားပြိုင်ပွဲသို့ တစ်ကျော့ပြန်ဝင်ရောက်လာသည့် စကော့တလန်အသင်း ဟေတီကို ၁-၀ ဂိုးဖြင့် အနိုင်ရကာ အုပ်စု C ကို ဦးဆောင်

World Cup ၊ ဇွန် ၁၄ ၊​ Horizons

မက်ဆာချူးဆက်ပြည်နယ်၊ ဖောက်စ်ဘိုရိုမြို့ရှိ ဂီလက်တက် (Gillette) အားကစားကွင်းတွင် ကျင်းပခဲ့သော ၂၀၂၆ ကမ္ဘာ့ဖလား အုပ်စု C အဖွင့်ပွဲစဉ်တွင် စကော့တလန်အသင်းက ဟေတီအသင်းကို ၁-၀ ဂိုးဖြင့် အနိုင်ရရှိခဲ့သည်။ 

ဆယ်စုနှစ်များစွာကြာပြီးနောက် ကမ္ဘာ့ဖလားပြိုင်ပွဲသို့ တစ်ကျော့ပြန် ဝင်ရောက်လာသည့် အသင်းနှစ်သင်း၏ အကြိတ်အနယ် ယှဉ်ပြိုင်မှုဖြစ်ပြီး၊ ပွဲချိန် ၂၈ မိနစ် (ရေသောက်ချိန်အပြီး) တွင် ဂျွန်မက်ဂင် (John McGinn) က ပြန်ထွက်လာသော ဘောလုံးကို ပိတ်သွင်းကာ စကော့တလန်အတွက် တစ်လုံးတည်းသော အနိုင်ဂိုးကို သွင်းယူပေးခဲ့သည်။

ဟေတီအသင်းသည် တိုက်စစ်ဆင်မှု အားကောင်းခဲ့ပြီး ဘောလုံးဖြတ်တင်မှုများ အကောင်းဆုံး ပြုလုပ်နိုင်ခဲ့သော်လည်း အဆုံးသတ်ပိုင်း အားနည်းမှုကြောင့် ချေပဂိုးရရှိရန် ရုန်းကန်ခဲ့ရသည်။ 

ဟေတီအသင်းအနေဖြင့် ယခုပွဲစဉ်တွင် ဂိုးပေါက်ကန်သွင်းမှု (၁၅) ကြိမ်အထိ ရှိခဲ့ပြီး လူကျွံဘော (၃) ကြိမ် သတ်မှတ်ခံခဲ့ရကာ အခွင့်အရေးများကို အသုံးမချနိုင်ခဲ့ပေ။

 စကော့တလန်အသင်းအတွက်မူ ယခုပွဲစဉ်သည် ၁၉၉၈ ခုနှစ်နောက်ပိုင်း (၂၈) နှစ်ကြာမှ ကမ္ဘာ့ဖလားသို့ အောင်ပွဲဖြင့် ဂုဏ်ယူဖွယ် ပြန်လည်ဝင်ရောက်လာနိုင်ခြင်းဖြစ်သည်။

ယခုအနိုင်ရလဒ်နှင့်အတူ စကော့တလန်အသင်းသည် ရမှတ် (၃) မှတ်ဖြင့် အုပ်စု C ၏ ထိပ်ဆုံးနေရာကို ရယူထားနိုင်ခဲ့သည်။ စနေနေ့က ယှဉ်ပြိုင်ကစားခဲ့သော အုပ်စုတွင်း အခြားပွဲစဉ်ဖြစ်သည့် ဘရာဇီးလ်နှင့် မော်ရိုကိုတို့ ပွဲစဉ်မှာ သရေကျခဲ့သည့်အတွက် စကော့တလန်က တစ်သင်းတည်းသော အနိုင်ရအသင်းအဖြစ် အုပ်စုကို ဦးဆောင်ထားနိုင်ခြင်းဖြစ်သည်။

 ဒုတိယပွဲစဉ်များအဖြစ် စကော့တလန်က မော်ရိုကိုအသင်းနှင့် ယှဉ်ပြိုင်ရမည်ဖြစ်ပြီး ဟေတီက အင်အားကြီး ဘရာဇီးလ်အသင်းနှင့် ဆက်လက် ကစားရမည်ဖြစ်သည်။