ဇာတ်ပွဲ - အီနောင်၊ ရာမကနေ ဖိုးစိန်၊ ရွှေမန်း။ မြန်မာတွေ ကြိုက်တဲ့ ရွှေမင်းသားများ

ခေတ်ပေါ် သီချင်းတွေကို ဇာတ်မင်းသားတွေ ဆိုတဲ့ခေတ်ထိ ပြောင်းလဲလာတဲ့ ဇာတ်ပွဲ

ဇာတ်၊ အငြိမ့်၊ ရုပ်သေးနဲ့ ဆိုင်းဆိုတဲ့ မြန်မာ့သဘင်လေးရပ်မှာ ဇာတ်ပွဲက ထိပ်တန်းက လူကြိုက်အများဆုံးဖြစ်ပါတယ်။ မြေဝိုင်းခေတ်ကနေ ရုံကြီးနဲ့ ပြတဲ့ခေတ်၊ နောက်ပိုင်းဇာတ်ကြီးတွေ အလေးပေး ကတဲ့ခေတ်ကနေ ခေတ်ပေါ် သီချင်းတွေကို ဇာတ်မင်းသားတွေ ဆိုတဲ့ခေတ်ထိ ပြောင်းလဲလာပေမယ့် ဇာတ်ပွဲဟာ ပွဲကြိုက်မြန်မာလူထုရဲ့ သည်းခြေကြိုက် ဖျော်ဖြေပွဲ ဖြစ်ပါတယ်။ တချိန်က အမြင့်သဘင်ဆိုပြီး ထိပ်က နေခဲ့တဲ့ ရုပ်သေးက တိမ်မြုပ်နေပြီး အနိမ့်သဘင် ဇာတ်ပွဲက စင်မြင့်ပေါ် ရောက်လာခဲ့တာပါ။

မြန်မာဇာတ်ပွဲဟာ အနောက်နိုင်ငံ ဇာတ်သဘင်တွေနဲ့ မတူဘဲ အဆို အပြော အငို အသောတွေကို အကနဲ့ မြိုင်မြိုင်ဆိုင်ဆိုင် ညလုံးပေါက် ဖျော်ဖြေကြတဲ့ ပဒေသာကပွဲကြီးမျိုးဖြစ်ပြီး ခေါင်းဆောင်မင်းသားက ဇာတ်ဆရာအဖြစ် ဦးစီးတာဖြစ်ပါတယ်။ အပျိုတော်၊ ယိမ်းအကနဲ့ ဝန်ကြီးလေးပါး ထွက်ခန်းကနေ နှစ်ပါးသွားနဲ့ နောက်ပိုင်းဇာတ်ထုပ်ကြီးထိ ဖျော်ဖြေခဲ့ကြတဲ့ ဇာတ်သဘင်မှာ ဒုတိယကမ္ဘာစစ်ပြီးခေတ်ကစလို့ ပြဇာတ်နဲ့ အော်ပရာ ထွန်းကားလာပြီး ၂၀ ရာစု နှောင်းပိုင်းမှာတော့ စတိတ်ရှိုးခေါ် ခေတ်ပေါ် သီချင်းသီဆိုတာတွေ ခေတ်စားလာပါတယ်။

မြန်မာဇာတ်သဘင်ကို ရှေးရိုး ရေနံဆီ မီးခွက်ထွန်း မြေဝိုင်းဇာတ်ကနေ ရုံသွင်းပြီး စင်မြင့်မှာ မီးရောင်စုံနဲ့ ကပြတဲ့အဆင့်ထိ တိုးမြှင့်ပေးခဲ့သူက ဂရိတ်ဘိုးစိန်ကြီးလို့ သိကြတဲ့ ဦးဖိုးစိန်ဖြစ်ပြီး မင်းသားက၊ ဗုဒ္ဓဘုရားဟောဇာတ်တော်တွေကို ဖျော်ဖြေမှုနဲ့ သံရိုးကနေ ငါးပေါက် ခြောက်ပေါက်သံတွေနဲ့ သီဆိုမှု ပြောင်းလဲတာတွေကို ဆန်းသစ်တီထွင်ခဲ့သူလည်း ဖြစ်ပါတယ်။