နှစ်ဂိုးပြတ်ရှုံးနေရာမှ အီဂျစ်ကို အံ့ဖွယ်နောက်ကလိုက်ကာ အနိုင်ယူခဲ့သည့် အာဂျင်တီးနား

အတ္တလန်တာ ၊ ဇူလိုင် ၈ ၊ Horizons

အမေရိကန်နိုင်ငံ၊ ဂျော်ဂျီယာပြည်နယ်၊ အတ္တလန်တာ အားကစားကွင်း၌ ဇူလိုင်လ ၇ ရက်နေ့က ယှဉ်ပြိုင်ကစားခဲ့သော ၂၀၂၆ ခုနှစ် ဖီဖာ ကမ္ဘာ့ဖလား ပြိုင်ပွဲ၏ ရှုံးထွက် ၁၆ သင်းအဆင့် ပွဲစဉ်တွင် အာဂျင်တီးနားအသင်းက နှစ်ဂိုးပြတ် ရှုံးနိမ့်နေရာမှ အီဂျစ်အသင်းကို နောက်ကလိုက်ကာ ၃-၂ ဂိုးဖြင့် အံ့မခန်း အနိုင်ရရှိသွားခဲ့သည်။

ပွဲအစပိုင်းတွင် အီဂျစ်အသင်းက ခြေစွမ်းပြကစားနိုင်ခဲ့ပြီး ပွဲချိန် ၁၅ မိနစ်တွင် ယာဆာ အီဘရာဟင်  က ခေါင်းတိုက်ကာ အဖွင့်ဂိုးကို သွင်းယူပေးခဲ့သည်။ 

ထို့နောက် အီဂျစ်ဂိုးသမား မိုစတာဖာ ရှိုဘီရာ  သည် တာဂလီယာဖီကို ရရှိခဲ့သည့် ပယ်နယ်တီကို မက်ဆီ ကန်သွင်းရာတွင် အကောင်းဆုံး ကာကွယ်နိုင်ခဲ့သည့်အပြင်၊ မက်အယ်လစ္စတာ နှင့် အယ်လ်ဗာရက်ဇ် တို့၏ ကန်ချက်များကိုပါ လက်စွမ်းပြ ကာကွယ်နိုင်ခဲ့သည်။

ပွဲချိန် ၆၇ မိနစ်တွင် မိုဟာမက်ဆာလာ  နှင့် ဟာဆန် တို့ ပါဝင်သည့် လျင်မြန်သော တန်ပြန်တိုက်စစ်မှတစ်ဆင့် မိုစတာဖာ ဇီကို  က အီဂျစ်အသင်းအတွက် ဒုတိယဦးဆောင်ဂိုးကို သွင်းယူပေးခဲ့ရာ အီဂျစ်တို့ သမိုင်းဝင် နိုင်ပွဲရရန် အလွန်နီးစပ်ခဲ့သည်။

သို့သော်လည်း ပွဲချိန် ၇၉ မိနစ်တွင် ခရစ္စတီယန် ရိုမဲရိုး က အာဂျင်တီးနားအတွက် ပထမချေပဂိုးကို သွင်းယူပေးခဲ့ပြီးနောက် ပွဲအလှည့်အပြောင်း ဖြစ်သွားခဲ့သည်။ ထို့နောက် ပွဲချိန် ၈၄ မိနစ်တွင် အသင်းခေါင်းဆောင် လီယွန်နယ် မက်ဆီ က အကောင်းဆုံး သွင်းချက်ဖြင့် ဒုတိယချေပဂိုးကို သွင်းယူပေးခဲ့သည်။ ပွဲပြီးဆုံးရန် နီးကပ်နေချိန် နာကျင်အချိန်ပို ၉၀+၂ မိနစ်တွင် အင်န်ဇို ဖာနန်ဒက်ဇ်  က အာဂျင်တီးနားအတွက် အဖိုးတန် အနိုင်ဂိုးကို သွင်းယူပေးခဲ့ရာ အာဂျင်တီးနားတို့ သမိုင်းဝင် အံ့ဖွယ်နိုင်ပွဲကို ရယူနိုင်ခဲ့ခြင်းဖြစ်သည်။

အဆိုပါပွဲစဉ်မှ အနိုင်ရရှိခဲ့သော အာဂျင်တီးနားအသင်းသည် ကွာတားဖိုင်နယ်သို့ တက်ရောက်သွားပြီဖြစ်ပြီး၊ ဆွစ်ဇာလန်နှင့် ကိုလံဘီယာတို့ ယှဉ်ပြိုင်ကစားမည့်ပွဲမှ အနိုင်ရရှိသည့် အသင်းနှင့် ဆက်လက် ယှဉ်ပြိုင်သွားရမည်ဖြစ်သည်။