ဘုရင့်နောင်ကုန်စည်ဒိုင်၏ ဇွန်လ ၁၂ ရက်နေ့ မတ်ပဲ၊ ကြက်သွန်နှင့် စားသောက်ကုန် ဈေးကွက် အခြေအနေများ

ရန်ကုန်၊ ဇွန် ၁၂ ၊ Horizons

ရန်ကုန်တိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်း၊ ဘုရင့်နောင်ကုန်စည်ဒိုင်၏ ၂၀၂၆ ခုနှစ်၊ ဇွန်လ ၁၂ ရက်နေ့အတွက် ထုတ်ပြန်ထားသော ကုန်ဈေးနှုန်းစာရင်းများအရ ပဲမျိုးစုံ ဈေးကွက်တွင် မတ်ပဲနှင့် ပဲစင်းငုံ အရောင်းအဝယ်များ ဖြစ်ပေါ်လျက်ရှိကြောင်း သိရသည်။

အဆိုပါ နေ့စဉ်ပေါက်ဈေးများအရ ၂၀၂၆ ခုနှစ်ထွက် မတ်ပဲ (FAQ/RC) တစ်တန်လျှင် ၃,၀၇၁,၀၀၀ ကျပ်ဖြင့် ကွန်တိန်နာ ၂၅ လုံး အရောင်းအဝယ်ဖြစ်ခဲ့ပြီး၊ မတ်ပဲ (SQ/RC) တစ်တန်လျှင် ၃,၃၇၀,၀၀၀ ကျပ်ဖြင့် ကွန်တိန်နာ ၅ လုံး အရောင်းအဝယ်ဖြစ်ခဲ့ကြောင်း ဖော်ပြထားသည်။

ထို့ပြင် ၂၀၂၆ ခုနှစ်ထွက် ပဲစင်းငုံနီ (RC) သည်လည်း တစ်တန်လျှင် ၃,၁၁၁,၀၀၀ ကျပ် ပေါက်ဈေးရှိနေကြောင်း စာရင်းများအရ သိရှိရသည်။

စားဖိုဆောင်သုံး ကုန်စည်များဖြစ်သည့် ကြက်သွန်နီ၊ ကြက်သွန်ဖြူနှင့် အာလူး ဈေးကွက်တွင်လည်း အရောင်းအဝယ်များ ပုံမှန်ရှိနေပြီး ဆိပ်ဖြူကြက်သွန်နီမှာ အမျိုးအစားအလိုက် တစ်ပိဿာလျှင် ၂၆၀၀ ကျပ်မှ ၃၇၅၀ ကျပ်အထိ ဈေးပေါက်ကာ ကား ၁၅ စီး (ပိဿာချိန် ၉၀,၀၀၀) ဝင်ရောက် အရောင်းအဝယ်ဖြစ်ခဲ့သည်။

ကြူကုတ် ကြက်သွန်ဖြူ (ရှယ်) မှာ တစ်ပိဿာလျှင် ၁၄၅၀၀ ကျပ်ဖြင့် အိတ် ၂၂၅ အိတ် (ပိဿာ ၄,၅၀၀) အရောင်းအဝယ်ဖြစ်ခဲ့သလို၊ ပန်းရဲ၊ မြားနီ၊ ဆင်ဖြူကျွန်း စသည့် ငရုတ်သီးများမှာလည်း အိတ် ၅၀၀ (ပိဿာ ၁၀,၀၀၀) အရောင်းအဝယ် ဖြစ်ခဲ့ကြောင်း သိရသည်။

အလားတူ အောင်ပန်း အာလူးဈေးကွက်တွင်လည်း တစ်ပိဿာလျှင် ၁၇၀၀ ကျပ်မှ ၂၃၀၀ ကျပ်ကြား ဈေးပေါက်နေပြီး ကား ၁၁ စီး (ပိဿာချိန် ၆၆,၀၀၀) အရောင်းအဝယ်ဖြစ်ခဲ့ကြောင်း ဘုရင့်နောင်ကုန်စည်ဒိုင်၏ မှတ်တမ်းများတွင် ဖော်ပြထားသည်။

ရေထွက်ကုန်ပစ္စည်းများနှင့် အခြားကုန်ခြောက်များ ဈေးကွက်အခြေအနေကို ကြည့်မည်ဆိုပါက ဖျာပုံရွှေပုစွန်ခြောက် (ရှယ်) မှာ တစ်ပိဿာလျှင် ၂၇၀,၀၀၀ ကျပ်မှ ၃၀၀,၀၀၀ ကျပ်အထိ ဈေးမြင့်မားလျက်ရှိပြီး၊ ငါးကွမ်းရှပ်ကြီး တစ်ပိဿာလျှင် ၃၅,၀၀၀ ကျပ်မှ ၄၀,၀၀၀ ကျပ်၊ ငါးရံ့ကြီး တစ်ပိဿာလျှင် ၅၅,၀၀၀ ကျပ်မှ ၆၀,၀၀၀ ကျပ် စသဖြင့် အသီးသီး ဈေးပေါက်လျက်ရှိသည်။

ထို့အပြင် ပြည်တွင်းဖြစ် သကြားမှာ တစ်ပိဿာလျှင် ၃၇၀၀ ကျပ်မှ ၄၁၀၀ ကျပ်ဝန်းကျင်တွင် ရှိနေပြီး ကြံသကာ (သစ်) မှာ ၄၂၀၀ ကျပ်နှင့် မန်ကျည်းသီးအသား (သစ်) မှာ ၆၀၀၀ ကျပ်မှ ၇၂၀၀ ကျပ်အထိ ပေါက်ဈေးရှိကြောင်း ရန်ကုန်တိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်း ရုံးအဖွဲ့မှူး ဦးကျော်ကျော်သိန်း လက်မှတ်ရေးထိုး ထုတ်ပြန်ထားသည့် ဈေးနှုန်းသတင်းအချက်အလက်များအရ အသေးစိတ် သိရှိရသည်။