မိုက်ကယ်အိုလစ်ဆီကို ရောင်းချမည်မဟုတ်ကြောင်း ဘိုင်ယန်မူးနစ် အခိုင်အမာဆို၊ အယ်လ်ဗာရက်ဇ်ကို ဆက်ထိန်းထားရန် အက်သလက်တီကို ဆုံးဖြတ်ထား

ဇွန် ၉ ၊ Horizons

ဘိုင်ယန်မူးနစ်အသင်းသည် ၎င်းတို့၏ တောင်ပံတိုက်စစ်ကစားသမား မိုက်ကယ်အိုလစ်ဆီ (Michael Olise) အား ယူရိုသန်း ၁၅၀ ဖြင့် ကမ်းလှမ်းလာလျှင်ပင် ရောင်းချမည်မဟုတ်ကြောင်း ပြတ်ပြတ်သားသား ထုတ်ဖော်ပြောဆိုလိုက်သည်။ 

ထို့ပြင် အခြားကလပ်အသင်းများအနေဖြင့် ကမ်းလှမ်းမှုများ လာရောက်မလုပ်ဆောင်ရန်လည်း အရိပ်အမြွက် သတိပေးထားကြောင်း သိရသည်။

အခြားတစ်ဖက်တွင်လည်း အက်သလက်တီကိုမက်ဒရစ် တိုက်စစ်မှူး ဂျူလီယန် အယ်လ်ဗာရက်ဇ် (Julián Álvarez) အား ရီးရဲလ်မက်ဒရစ်အသင်းက စံချိန်တင်ပြောင်းရွှေ့ကြေးဖြင့် ကမ်းလှမ်းမည်ဆိုသော သတင်းများ ထွက်ပေါ်နေသည်။ 

ယင်းသတင်းများနှင့် ပတ်သက်၍ အယ်လ်ဗာရက်ဇ်၏ ကိုယ်စားလှယ်ဘက်က "မှတ်ချက်မပေးလိုကြောင်း" သာ တုံ့ပြန်ခဲ့ပြီး၊ ကစားသမား၏ အသိုင်းအဝိုင်းကလည်း ၎င်းတို့ထံ တရားဝင် ကမ်းလှမ်းလာခြင်း မရှိသေးကြောင်း အတည်ပြုထားသည်။ 

ယင်းအခြေအနေနှင့် ပတ်သက်၍ ရီးရဲလ်မက်ဒရစ်ဥက္ကဋ္ဌ ဖလော်ရန်တီနို ပီရက်ဇ် (Florentino Pérez) က "ကျွန်တော်တို့က ကစားသမားကို မဆက်သွယ်ခင် သက်ဆိုင်ရာ ကလပ်အသင်းကို အရင်ဆက်သွယ်လေ့ရှိပါတယ်" ဟု ပြီးခဲ့သည့် သောကြာနေ့က ဖွင့်ဟပြောကြားထားသည်။

ထို့အပြင် ဘာစီလိုနာအသင်းက အယ်လ်ဗာရက်ဇ်အတွက် ယူရိုသန်း ၁၀၀ ဖြင့် ကမ်းလှမ်းလာမှုကို အက်သလက်တီကိုမက်ဒရစ်အသင်းက လွန်ခဲ့သောတစ်ပတ်ခန့်ကပင် ပယ်ချခဲ့ပြီး၊ အဆိုပါ ကမ်းလှမ်းမှုမျိုးဖြင့် ဆွေးနွေးရန် စိတ်မဝင်စားကြောင်း ပြသခဲ့သည်။ 

အက်သလက်တီကိုမက်ဒရစ်အသင်း၏ ရပ်တည်ချက်မှာ ရှင်းလင်းပြတ်သားပြီး "ဂျူလီယန် အယ်လ်ဗာရက်ဇ်ကို အသင်း၌သာ ဆက်လက်ထိန်းသိမ်းထားလိုကြောင်း" အတိအလင်း အသိပေးထားသည်။