အာဆီယံ Hyundai Cup ၂၀၂၆ ဗိုလ်လုပွဲ ပထမအကျော့တွင် ထိုင်းနှင့် ဗီယက်နမ် ထိပ်တိုက်တွေ့မည်
- Horizons News
- Aug 22
- 1 min read
ဘန်ကောက် ၊ ဩဂုတ် ၂၂ ၊ Horizons Sports
အာဆီယံ Hyundai Cup ၂၀၂၆ ပြိုင်ပွဲ၏ ဗိုလ်လုပွဲ ပထမအကျော့အဖြစ် အစဉ်အလာပြိုင်ဘက်များဖြစ်ကြသော ထိုင်းအသင်းနှင့်ဗီယက်နမ်အသင်းတို့ ယနေ့ (ဩဂုတ်လ ၂၂ ရက်) ည (၈) နာရီအချိန်တွင်ဘန်ကောက်မြို့ရှိ ရာဇမင်္ဂလာအမျိုးသားအားကစားကွင်းကြီး၌ အကြိတ်အနယ် ယှဉ်ပြိုင်ကစားကြမည်ဖြစ်သည်။
ယခုပွဲစဉ်သည် အသင်းနှစ်သင်းအကြားပြိုင်ပွဲသမိုင်းတစ်လျှောက် အရေးကြီးသည့်ထိပ်တိုက်တွေ့ဆုံမှု တစ်ပွဲဖြစ်ပြီး ဗိုလ်လုပွဲကို အိမ်ကွင်း၊ အဝေးကွင်း နှစ်ကျော့ကစားသည့် စနစ်ဖြင့် ကျင်းပသွားမည်ဖြစ်သည်။ဒုတိယအကျော့ကို လာမည့် ဩဂုတ်လ (၂၆) ရက်နေ့တွင် ဗီယက်နမ်နိုင်ငံ၊ ဟနွိုင်းမြို့ရှိ မိုင်ဒင်းအမျိုးသားအားကစားကွင်း၌ ဆက်လက်ကစားမည်ဖြစ်သည်။
လက်ရှိ ချန်ပီယံ ဗီယက်နမ်အသင်းသည် ၂၀၀၈၊ ၂၀၁၈ နှင့် ၂၀၂၄ ခုနှစ်များတွင် အာဆီယံချန်ပီယံဆုကို ဆွတ်ခူးရရှိထားပြီး၊ ယခုနှစ်တွင်စတုတ္ထမြောက်ချန်ပီယံဆုနှင့်အတူဆက်တိုက်ချန်ပီယံဖြစ်မည့် သမိုင်းမှတ်တိုင်သစ်ကိုရယူနိုင်ရန် ကြိုးပမ်းနေသည်။ဗီယက်နမ်အသင်းအတွက် ရာဇမင်္ဂလာကွင်းမှာ ၂၀၂၄ ခုနှစ် ဗိုလ်လုပွဲတွင်ထိုင်းကိုနှစ်ကျော့ပေါင်း (၅-၃) ဂိုးဖြင့်အနိုင်ရခဲ့ဖူးသည့် အမှတ်တရကောင်းများရှိသောကွင်းတစ်ခုဖြစ်ရာယခုတစ်ကြိမ်တွင်လည်း ပထမအကျော့အဝေးကွင်းပွဲမှ အသာစီးရလဒ် ရယူနိုင်ရန်မျှော်လင့်လျက်ရှိသည်။
ဗီယက်နမ်၏ တိုက်စစ်ပိုင်းတွင် ဆီမီးဖိုင်နယ်၌ မလေးရှားဘက်သို့ဦးဆောင်ဂိုးသွင်းယူပေးခဲ့သည့် ငုယင်ရွှမ်ဆွန် နှင့် ငုယင်ဒင်ဘက် တို့က အဓိကကစားသမားများအဖြစ်အာရုံစိုက်ခံနေရသည်။ ဗီယက်နမ်နည်းပြ ကင်ဆန်ဆစ် ကလည်းအသင်းအနေဖြင့်ယခုဗိုလ်လုပွဲတွင်ဆုဖလားကိုကာကွယ်နိုင်ရန် အလွန်စိတ်အားထက်သန်နေကြောင်း ပြောဆိုထားသည်။
အခြားတစ်ဖက်တွင်ထိုင်းအသင်းမှာအာဆီယံချန်ပီယံရှစ် သမိုင်းတစ်လျှောက် ၁၉၉၆၊ ၂၀၀၀၊ ၂၀၀၂၊ ၂၀၁၄၊ ၂၀၁၆၊ ၂၀၂၀ နှင့် ၂၀၂၂ ခုနှစ်များတွင်ဗိုလ်စွဲကာ ချန်ပီယံ (၇) ကြိမ်ရရှိထားပြီး၊ ယခုနှစ်တွင် အဋ္ဌမမြောက်ချန်ပီယံဆုကိုရယူရန်ကြိုးပမ်းနေသည်။ထိုင်းအသင်းသည် ဆီမီးဖိုင်နယ်တွင် စင်ကာပူအသင်းကိုနှစ်ကျော့ပေါင်း (၄-၃) ဂိုးဖြင့် အနိုင်ရရှိကာဗိုလ်လုပွဲသို့တက်ရောက်လာခြင်းဖြစ်သည်။
ယခုဗိုလ်လုပွဲတွင် ထိုင်းအသင်းအတွက်အိမ်ကွင်းပရိသတ်များ၏ အားပေးမှုသည်အလွန်အရေးပါမည်ဖြစ်ပြီး ပထမအကျော့မှာပင်အသာစီးရလဒ်တစ်ခုဖန်တီးကာ ဟနွိုင်းတွင်ကစားရမည့် ဒုတိယအကျော့အတွက် အခြေအနေကောင်းတစ်ရပ်ကိုတည်ဆောက်လိုနေမည်ဖြစ်သည်။
ထိုင်းနှင့် ဗီယက်နမ်တို့သည် ၂၀၂၂ နှင့် ၂၀၂၄ ခုနှစ် ဗိုလ်လုပွဲများတွင်လည်းတွေ့ဆုံခဲ့ကြဖူးရာ ယခု ၂၀၂၆ ခုနှစ် ဗိုလ်လုပွဲသည် အဆိုပါအသင်းနှစ်သင်း (၃) ကြိမ်ဆက်တိုက်ဗိုလ်လုပွဲ၌ ထိပ်တိုက်တွေ့ဆုံခြင်း ဖြစ်လာသည်။
ထို့ကြောင့် ယနေ့ညယှဉ်ပြိုင်ကစားမည့် ပွဲစဉ်သည် အာဆီယံဘောလုံးပရိသတ်များအတွက် အလွန်စိတ်ဝင်စားဖွယ်ကောင်းသည့် ဒေသတွင်းပြိုင်ဆိုင်မှုပြင်းထန်သော ပွဲစဉ်တစ်ပွဲ ဖြစ်လာမည်ဖြစ်သည်။
Comments