အသက် (၄၀) အရွယ် ဂိုးသမား ဗိုဇင်ညာ၏ အံ့မခန်းလက်စွမ်းဖြင့် နာမည်ကြီးစပိန်ကို ကိပ်ဗာဒီအသင်း သမိုင်းဝင်သရေရလဒ် ဖန်တီးနိုင်ခဲ့

ဇွန် ၁၆ ၊ Horizons

၂၀၂၆ ကမ္ဘာ့ဖလားပြိုင်ပွဲ၏ အံ့အားသင့်ဖွယ် အကောင်းဆုံးဇာတ်လမ်းတစ်ပုဒ်ကို ကိပ်ဗာဒီ (Cape Verde) အသင်း၏ အသက် (၄၀) အရွယ် အဓိကဂိုးသမား ဗိုဇင်ညာ (Vozinha) က ဖန်တီးပြသလိုက်ပြီဖြစ်သည်။ 

နာမည်ကြီး စပိန်အသင်းနှင့် ယှဉ်ပြိုင်ကစားခဲ့ရသည့် ကမ္ဘာ့ဖလားအုပ်စုပွဲစဉ်တွင် ဗိုဇင်ညာသည် ၎င်း၏ ဘဝတစ်သက်တာ အကောင်းဆုံးစွမ်းဆောင်ရည်ကို ထုတ်ပြနိုင်ခဲ့ပြီး စပိန်အသင်း၏ အန္တရာယ်ရှိသော တိုက်စစ်ဆင်မှုများကို ခုနစ်ကြိမ်တိုင်တိုင် လက်စွမ်းပြကာကွယ်နိုင်ခဲ့သောကြောင့် နိုင်ငံအသင်းအတွက် (၀-၀) ဆိုသည့် သမိုင်းဝင်သရေတစ်မှတ်ကို ရယူပေးနိုင်ခဲ့ခြင်းဖြစ်သည်။

ဘောလုံးလောကတွင် ဗိုဇင်ညာဟု လူသိများသော်လည်း ၎င်း၏ နာမည်အပြည့်အစုံမှာ ဂျိုစီမာ ဂျိုဆေး အီဗိုရာ ဒီးယက်စ် (Josimar José Évora Dias) ဖြစ်ပြီး လက်ရှိတွင် ပေါ်တူဂီ ဒုတိယတန်းကလပ် GD Chaves တွင် ပါဝင်ကစားနေသူဖြစ်သည်။

ယခုပွဲစဉ်သည် ကိပ်ဗာဒီနိုင်ငံအတွက် သမိုင်းတစ်လျှောက် ပထမဆုံးသော ကမ္ဘာ့ဖလားပွဲစဉ်ဖြစ်သလို၊ ဗိုဇင်ညာအတွက်လည်း အသက် (၄၀) အရွယ်မှ ကမ္ဘာ့အဆင့်စင်မြင့်ထက်သို့ ပထမဆုံးအကြိမ် တက်ရောက်ခွင့်ရသည့် အမှတ်တရပွဲတစ်ပွဲ ဖြစ်လာခဲ့သည်။ ပွဲပြီးဆုံးချိန်တွင် ဝမ်းသာလွန်း၍ မျက်ရည်ကျခဲ့သည့် ၎င်း၏ပုံရိပ်များကြောင့် တစ်ကမ္ဘာလုံးရှိ ဘောလုံးပရိသတ်များ၏ လေးစားချီးကျူးမှုကိုပါ အခိုင်အမာ ရရှိခဲ့သည်။

နိုင်ငံအသင်းအတွက် နှစ်ပေါင်းများစွာ တာဝန်ထမ်းဆောင်ခဲ့သည့် ဗိုဇင်ညာကို ကိပ်ဗာဒီဘောလုံးသမိုင်းတစ်လျှောက် အကောင်းဆုံးဂိုးသမားများထဲမှ တစ်ဦးအဖြစ် သတ်မှတ်ထားကြသည်။ သူ၏ ဇွဲလုံ့လ၊ အတွေ့အကြုံနှင့် ခေါင်းဆောင်မှုအရည်အသွေးများက ကိပ်ဗာဒီအသင်းကို ကမ္ဘာ့စင်မြင့်ပေါ်အထိ ရောက်ရှိလာစေရန် များစွာတွန်းအားပေးနိုင်ခဲ့သည်။ 

ယခု သမိုင်းဝင်လက်စွမ်းပြမှုအပြီးတွင် ဗိုဇင်ညာ၏ လူမှုကွန်ရက် အင်စတာဂရမ် (Instagram) အကောင့်တွင်လည်း ဖော်လိုဝါ (Follower) အရေအတွက်မှာ ငါးသောင်း (50K) မှနေ၍ နှစ်သန်း (2M) ကျော်အထိ အချိန်တိုအတွင်း အံ့အားသင့်ဖွယ် မြင့်တက်လာခဲ့ကြောင်း သိရှိရသည်။