၂၀၂၆ ကမ္ဘာ့ဖလား အုပ်စု (I) ပွဲစဉ်များတွင် ပြင်သစ်နှင့် ဆီနီဂေါတို့ ဂိုးပြတ်အနိုင်ရရှိ

ဇွန် ၂၇ ၊​ Horizons

၂၀၂၆ ခုနှစ် ကမ္ဘာ့ဖလားပြိုင်ပွဲ၏ အုပ်စု (I) ပွဲစဉ်တစ်ပွဲအဖြစ် ဘော်စတွန်အားကစားကွင်းတွင် ယှဉ်ပြိုင်ကစားခဲ့သော ပြင်သစ်နှင့် နော်ဝေတို့၏ ပွဲစဉ်တွင် ပြင်သစ်အသင်းက ၄-၁ ဂိုးဖြင့် အနိုင်ရရှိကာ အုပ်စုထိပ်ဆုံးနေရာကို ရယူနိုင်ခဲ့သည်။

ပွဲစတင်သည်နှင့် တိုက်စစ်ဆင်ကစားခဲ့သော ပြင်သစ်အသင်းသည် ၁၀ မိနစ်မပြည့်မီမှာပင် အမ်ဘာပေ (Kylian Mbappé) ၏ လှပသော ဖန်တီးမှုမှတစ်ဆင့် ဒမ်ဘီလီ (Ousmane Dembélé) က အဖွင့်ဂိုး သွင်းယူပေးခဲ့ပြီးနောက် ပထမပိုင်းအတွင်းမှာပင် ဒမ်ဘီလီက နောက်ထပ် နှစ်ဂိုးဆက်တိုက် သွင်းယူကာ ဟက်ထရစ် (Hat-trick) ရယူနိုင်ခဲ့သည်။

အဓိကတိုက်စစ်မှူး ဟာလန်း (Erling Haaland) မပါဝင်နိုင်ခဲ့သော နော်ဝေအသင်းသည် ချေပဂိုးတစ်ဂိုး ပြန်လည်သွင်းယူနိုင်ခဲ့သော်လည်း တိုက်စစ်စွမ်းအားထက်မြက်သည့် ပြင်သစ်အသင်းကို ယှဉ်ပြိုင်နိုင်ခြင်းမရှိဘဲ ဂိုးပြတ်ရှုံးနိမ့်ခဲ့ရသည်။

အလားတူ တိုရွန်တိုမြို့၌ ကျင်းပခဲ့သည့် အခြား အုပ်စု (I) ပွဲစဉ်တစ်ခုတွင်လည်း ဆီနီဂေါအသင်းက အီရတ်အသင်းကို ၅-၀ ဂိုးဖြင့် ဂိုးပြတ်အနိုင်ရရှိခဲ့ပြီး ရှုံးထွက်အဆင့်သို့ တက်ရောက်နိုင်ရေး မျှော်လင့်ချက်ကို ဆက်လက်ရှင်သန်စေခဲ့သည်။

ပွဲစကတည်းက တိုက်စစ်ဖွင့်ကစားခဲ့သည့် ဆီနီဂေါအသင်းသည် အီရတ်အသင်း၏ ခံစစ်ကို အပြင်းအထန် ဖိအားပေးနိုင်ခဲ့ပြီး အီရတ်အသင်းမှ ကစားသမားတစ်ဦး အနီကတ်ပြ ထုတ်ပယ်ခံရပြီးနောက်ပိုင်းတွင် ဘောလုံးပိုင်ဆိုင်မှုနှင့် တိုက်စစ်ဆင်မှုများကို အပြည့်အဝစိုးမိုးနိုင်ခဲ့သည်။

အီရတ်အသင်းအနေဖြင့် ဆီနီဂေါ၏ တိုက်စစ်ကို ထိရောက်စွာ ဟန့်တားနိုင်ခြင်းမရှိသလို သွင်းဂိုးလည်း ရယူနိုင်ခြင်းမရှိဘဲ ၅ ဂိုးပြတ်ဖြင့် စိတ်ပျက်ဖွယ် ရှုံးနိမ့်ခဲ့ရသည်။