၂၀၂၆ ကမ္ဘာ့ဖလား အဖွင့်ပွဲစဉ်တွင် မက္ကဆီကိုက တောင်အာဖရိကကို အနိုင်ရရှိကာ အုပ်စုတွင်း ဦးဆောင်

မက္ကဆီကိုစီးတီး၊ ဇွန် ၁၂ ၊ Horizons

၂၀၂၆ ဖီဖာ ကမ္ဘာ့ဖလားပြိုင်ပွဲကြီး၏ အဖွင့်ပွဲစဉ်တွင် အိမ်ရှင် မက္ကဆီကိုအသင်းက တောင်အာဖရိကအသင်းကို ခြေစွမ်းအသာစီးဖြင့် ကစားကာ ၂-၀ ဂိုးဖြင့် အနိုင်ရရှိခဲ့ပြီး အဆိုပါပွဲစဉ်တွင် တိုက်စစ်မှူး ဂျူလီယန် ကွင်နားနက်စ်က အဖွင့်ဂိုးသွင်းယူပေးခဲ့သလို ဒုတိယဂိုးအတွက်လည်း ဖန်တီးပေးနိုင်ခဲ့သည်။

မက္ကဆီကိုစီးတီး အားကစားကွင်းကြီးအတွင်း ပရိသတ်များ၏ အားပေးမှုအပြည့်အဝဖြင့် ကစားခဲ့ရသည့် ယင်းပွဲစဉ်တွင် နည်းပြ ဇာဗီယာ အဂွဲရီ၏ မက္ကဆီကိုအသင်းသည် ပွဲစတင်ပြီး ငါးမိနစ်မပြည့်မီမှာပင် ပထမဆုံး ဂိုးသွင်းခွင့်ကို စတင်ရရှိခဲ့သည်။

အစ္စရေး ရီးယက်စ် ညာဘက်ခြမ်းမှ ဖြတ်တင်ပေးလိုက်သည့်ဘောလုံးကို ရာအူးလ် ဟီမီနက်ဇ်က အားပါပါ ခေါင်းတိုက်ခဲ့သော်လည်း တောင်အာဖရိက ဂိုးသမား ရွန်ဝမ် ဝီလီယံစ်က လက်စွမ်းပြ ကာကွယ်နိုင်ခဲ့သည်။

သို့သော်လည်း ဂိုးမရှိ သရေရလဒ်မှာ မိနစ်အနည်းငယ်သာ ခံခဲ့သည်။

မက္ကဆီကို ကစားသမား အဲရစ် လီရာက တောင်အာဖရိက နောက်ခံလူ စဖီဖီလို ဆစ်သိုးလ်ထံမှ ဘောလုံးလုယူနိုင်ခဲ့ပြီးနောက် ဂျူလီယန် ကွင်နားနက်စ်က ပယ်နယ်တီအစွန်နားမှတစ်ဆင့် ဂိုးသမား ဝီလီယံစ်၏ ခြေနှစ်ချောင်းကြားမှ ကန်သွင်းကာ မက္ကဆီကိုတို့အတွက် အဖွင့်ဂိုးကို စတင်သွင်းယူပေးခဲ့သည်။

ပထမပိုင်းအပြီးတွင် တောင်အာဖရိကအသင်းအတွက် တစ်ဂိုးတည်းသာ ခွင့်ပြုခဲ့ရသော်လည်း ဒုတိယပိုင်းအစတွင် ၎င်းတို့အတွက် အခြေအနေများ ပိုမိုဆိုးရွားလာခဲ့သည်။

ဂိုးသွင်းရန် အပိုင်ထိုးဖောက် ဝင်ရောက်လာသည့် ဟီမီနက်ဇ်ကို ပြစ်ဒဏ်ကျူးလွန်ခဲ့သည့်အတွက် နောက်ခံလူ ဆစ်သိုးလ်မှာ တိုက်ရိုက်အနီကတ်ပြ ထုတ်ပယ်ခံခဲ့ရသည်။

နာမည်ကျော် လက်ဝှေ့သမား ကာနယ်လို အယ်လ်ဗာရက်ဇ် အပါအဝင် မက္ကဆီကို ပရိသတ်များသည် အသက် ၁၇ နှစ်အရွယ် ဂျေလ်ဘာတို မိုရာ လူစားဝင်လာချိန်တွင် သောင်းသောင်းဖျဖျ အားပေးခဲ့ကြပြီး တစ်မိနစ်မပြည့်မီမှာပင် ဒုတိယဂိုးအတွက် အောင်ပွဲခံနိုင်ခဲ့ကြသည်။

ကွင်နားနက်စ်နှင့် ဟီမီနက်ဇ်တို့ အချိတ်အဆက်မိမိ ကစားပြီးနောက် ရော်ဘတ်တို အယ်လ်ဗာရာဒိုထံသို့ ပေးပို့ခဲ့ရာ ၎င်း၏ ဖြတ်တင်ဘောမှတစ်ဆင့် ကျောနံပါတ် ၉ ဟီမီနက်ဇ်က နောက်တိုင်မှ ခေါင်းတိုက်သွင်းယူသွားခဲ့ခြင်း ဖြစ်သည်။

ပွဲပြီးခါနီးတွင် တောင်အာဖရိက လူစားဝင်ကစားသမား သမ်ဘာ ဇွမ်နီနှင့် မက္ကဆီကို နောက်ခံလူ ဆီဇာ မွန်တက်စ်တို့ နှစ်ဦးစလုံး အနီကတ်ပြ ထုတ်ပယ်ခံခဲ့ရသော်လည်း အိမ်ရှင် မက္ကဆီကိုတို့က ယုံကြည်မှုအပြည့်ဖြင့် အနိုင် ၃ မှတ်ကို ရယူသွားနိုင်ခဲ့သည်။ အဆိုပါ ပွဲစဉ်တွင် လူစားဝင်ကစားခဲ့သည့် ဂျေလ်ဘာတို မိုရာသည် အသက် ၁၇ နှစ်နှင့် ၂၄၀ ရက်ဖြင့် ကမ္ဘာ့ဖလားသမိုင်းတစ်လျှောက် ပီလီ၊ ဆင်မြူရယ် အီတူးတို့နောက် ဆဋ္ဌမမြောက် အသက်အငယ်ဆုံး ကစားသမားအဖြစ်လည်း မှတ်တမ်းဝင်ခဲ့သည်။

ပွဲအပြီးတွင် မက္ကဆီကို တိုက်စစ်မှူး ကွင်နားနက်စ်က ပရိသတ်များ၏ အားပေးမှုနှင့်အတူ အဖွင့်ဂိုးသွင်းယူနိုင်ခဲ့သည့်အတွက် အလွန်ဝမ်းမြောက်မိကြောင်းနှင့် အသင်းသားများ၏ စည်းလုံးမှုကြောင့် ယခုကဲ့သို့ နိုင်ပွဲရရှိခဲ့ခြင်းဖြစ်ကြောင်း ပြောကြားခဲ့သည်။

ထို့အတူ ဒုတိယဂိုးကို ဖန်တီးပေးခဲ့သူ အယ်လ်ဗာရာဒိုကလည်း မိမိအိမ်ကွင်းတွင် ယခုကဲ့သို့ ကစားခွင့်ရရန် အမြဲအိပ်မက်မက်ခဲ့ရပြီး ဟီမီနက်ဇ်၏ တောင်းဆိုမှုကြောင့် ယုံကြည်မှုအပြည့်ဖြင့် ဖြတ်တင်ဘော ပေးပို့နိုင်ခဲ့ခြင်းဖြစ်သည်ဟု ဆိုသည်။

တောင်အာဖရိက ဂိုးသမား ဝီလီယံစ်ကမူ ဤကဲ့သို့သော အဆင့်မြင့်ပြိုင်ပွဲမျိုးတွင် အမှားအယွင်းများအတွက် ပြင်းထန်စွာ အပြစ်ပေးခံရမည်ဖြစ်သော်လည်း အသင်းအနေဖြင့် နောက်ပွဲစဉ်များတွင် အကောင်းဆုံး ဆက်လက်တိုက်ပွဲဝင်သွားမည်ဖြစ်ကြောင်း သုံးသပ်ပြောကြားသွားခဲ့သည်။