ထိုင်းနိုင်ငံတွင် ငါးမျှားရာမှ ကလေးဦးခေါင်းခွံကို မျှားမိသဖြင့် ထိတ်လန့်သွားသည့် လူငယ် ငါးမျှားခြင်းကို အပြီးတိုင် စွန့်လွှတ်

ဇူလိုင် ၈ ရက်၊ Horizons

ထိုင်းနိုင်ငံ၊ အယုဒ္ဓယခရိုင်ရှိ ကျောက်ဖယားမြစ်အတွင်းသို့ ငါးမျှားထွက်ခဲ့သည့် အသက် (၂၃) နှစ်အရွယ် လူငယ်တစ်ဦးသည် ငါးမျှားတံတွင် ငြိလာသည်ကို ငါးအမှတ်ဖြင့် ဆွဲတင်လိုက်ရာမှ ကလေးငယ်တစ်ဦး၏ ဦးခေါင်းခွံ ဖြစ်နေသည်ကို မမျှော်လင့်ဘဲ တွေ့ရှိခဲ့ရသဖြင့် အလွန်အမင်း ထိတ်လန့်သွားကာ ငါးမျှားခြင်းကို အပြီးတိုင် စွန့်လွှတ်လိုက်ကြောင်း သိရသည်။

ဖြစ်စဉ်မှာ ယမန်နေ့ ဇူလိုင်လ ၇ ရက် ညပိုင်းက ဝပ်ဘွန်ကန်နာဝါး (Wat Bun Kan Nawat) ကျောင်းတိုက်ရှေ့ရှိ ကျောက်ဖယားမြစ်အတွင်းသို့ အဆိုပါလူငယ် ငါးသွားမျှားရာမှ ဖြစ်ပွားခဲ့ခြင်း ဖြစ်သည်။ ငါးမျှားကြိုး ငြိလာသဖြင့် ရေပေါ်သို့ ဆွဲတင်လိုက်ချိန်တွင် ငါးမဟုတ်ဘဲ လူဦးခေါင်းခွံတစ်ခု ဖြစ်နေသည်ကို တွေ့ရှိခဲ့ရခြင်း ဖြစ်သည်။

ကျွမ်းကျင်သူများ၏ စစ်ဆေးချက်များအရ အဆိုပါ ဦးခေါင်းခွံသည် ရေအောက်တွင် အနည်းဆုံး (၁) နှစ်ခန့် နစ်မြုပ်နေခဲ့သည့် ကလေးငယ်တစ်ဦး၏ ဦးခေါင်းခွံ ဖြစ်ကြောင်း သိရှိရသည်။

 ယင်းဖြစ်ရပ်ကြောင့် အဆိုပါလူငယ်မှာ အလွန်အမင်း တုန်လှုပ်ခြောက်ခြားသွားခဲ့ပြီး မိမိအနေဖြင့် နောက်နောင် ငါးမျှားခြင်းကို အပြီးတိုင် စွန့်လွှတ်ပြီဟု ချက်ချင်းပင် ထုတ်ဖော်ပြောဆိုခဲ့သည်။

အဆိုပါဖြစ်စဉ်နှင့် ပတ်သက်၍ ဒေသခံ ရပ်ကွက်/ကျေးရွာ အုပ်ချုပ်ရေးမှူးကမူ ၎င်းတို့၏ ဧရိယာတစ်ဝိုက်တွင် ကလေးငယ် ရေနစ်သေဆုံးဖူးသည့် မှတ်တမ်း လုံးဝမရှိခဲ့ဖူးသည့်အတွက် ယခုဦးခေါင်းခွံမှာ အခြားနေရာတစ်ခုခုမှ မြစ်ရေနှင့်အတူ မျှောပါလာခြင်း ဖြစ်နိုင်ကြောင်း သုံးသပ်ထားသည်။

ဒေသခံ ရွာသူရွာသားများကမူ ယခုကဲ့သို့ ထူးဆန်းစွာ ငါးမျှားချိတ်တွင် လာရောက်ငြိတွယ်ခြင်းသည် ကွယ်လွန်သွားသည့် ကလေးငယ်၏ ဝိညာဉ်က ၎င်းအတွက် ကုသိုလ်ကောင်းမှု ပြုလုပ်ပေးရန်နှင့် အမျှအတန်းပေးဝေရန် လာရောက် အကူအညီတောင်းခံခြင်း ဖြစ်နိုင်သည်ဟု ရိုးရာအယူအဆအတိုင်း ယုံကြည်နေကြသည်။

လက်ရှိတွင် သက်ဆိုင်ရာ တာဝန်ရှိသူများက အဆိုပါ ကလေးငယ်၏ ဦးခေါင်းခွံနှင့် ပတ်သက်၍ အသေးစိတ် မှုခင်းဆေးပညာဆိုင်ရာ စစ်ဆေးမှုများကို ဆက်လက် လုပ်ဆောင်လျက်ရှိကြောင်း သိရသည်။