အမေရိကန်တိုက်စစ်မှူး ဘာလိုဂန်၏ ပွဲပယ်ပြစ်ဒဏ်ကို FIFA ပယ်ဖျက်ပေးမှုတွင် သမ္မတထရမ့် ပါဝင်ပတ်သက်နေဟု ဝေဖန်ခံရ

ဝါရှင်တန် ၊ ဇူလိုင် ၆ ၊ Horizons

၂၀၂၆ ကမ္ဘာ့ဖလားပြိုင်ပွဲ၏ ရှုံးထွက် (၁၆) သင်းအဆင့် ဘယ်လ်ဂျီယံနှင့်ပွဲစဉ်တွင် အမေရိကန်တိုက်စစ်မှူး ဖိုလာရင် ဘာလိုဂန် အား ပါဝင်ကစားခွင့်ပြုလိုက်သည့် ကမ္ဘာ့ဘောလုံးအဖွဲ့ချုပ် ၏ အံ့အားသင့်ဖွယ် ဆုံးဖြတ်ချက်နောက်ကွယ်၌ အမေရိကန်သမ္မတ ဒေါ်နယ်ထရမ့် တိုက်ရိုက်ပါဝင်ပတ်သက်နေကြောင်း စောင့်ကြည့်ဝေဖန်မှုများ ပြင်းထန်စွာ ထွက်ပေါ်လျက်ရှိသည်။

ဘာလိုဂန်သည် ဘော့စနီးယားကို ၂-၀ ဂိုးဖြင့် အနိုင်ရရှိခဲ့သည့် (၃၂) သင်းအဆင့်ပွဲစဉ်တွင် တိုက်ရိုက်အနီကတ်ပြခံခဲ့ရသဖြင့် တစ်ပွဲပယ်ပြစ်ဒဏ် အလိုအလျောက် ကျခံရမည်ဖြစ်သော်လည်း ဖီဖာစည်းကမ်းထိန်းသိမ်းရေးကော်မတီက ၎င်းတို့၏ ဥပဒေပုဒ်မ ၂၇ ကို အသုံးပြုကာ ယင်းပွဲပယ်ပြစ်ဒဏ်ကို (၁) နှစ်ကြာ စောင့်ကြည့်ကာလအဖြစ် ပြောင်းလဲသတ်မှတ်ပြီး ပြစ်ဒဏ်ဆိုင်းငံ့ပေးခဲ့သောကြောင့် လာမည့် တနင်္လာနေ့ပွဲစဉ်တွင် ပြန်လည်ပါဝင်ခွင့် ရရှိသွားခြင်းဖြစ်သည်။

သတင်းရင်းမြစ်များ၏ အဆိုအရ သမ္မတထရမ့်သည် ဘာလိုဂန် အနီကတ်ပြခံရပြီးနောက် ၎င်းနှင့် ရင်းနှီးသည့်ဆက်ဆံရေးရှိသော ဖီဖာဥက္ကဋ္ဌ ဂျီယန်နီ အင်ဖန်တီနို  ထံ တိုက်ရိုက်ဖုန်းဆက်ကာ ဆုံးဖြတ်ချက်ကို ပြန်လည်သုံးသပ်ပေးရန် တောင်းဆိုခဲ့ကြောင်း သိရသည်။ ထို့ပြင် ထရမ့်က ၎င်း၏ Truth Social လူမှုကွန်ရက်တွင်လည်း မတရားမှုကို ပြင်ဆင်ပေးသည့် ဖီဖာကို အထူးကျေးရူးတင်ရှိကြောင်း ရေးသားခဲ့ရာ နိုင်ငံရေးအရ လွှမ်းမိုးမှုရှိနေခြင်းအပေါ် မေးခွန်းထုတ်စရာများ ဖြစ်လာခဲ့သည်။

ဖီဖာသည် ယခင်ကလည်း ပေါ်တူဂီတိုက်စစ်မှူး ခရစ်စတီယာနို ရော်နယ်ဒိုကို ဤစည်းမျဉ်းအတိုင်း ပြစ်ဒဏ်လျှော့ပေါ့ပေးခဲ့ဖူးသည့် သာဓကရှိခဲ့ကြောင်းလည်း သိရသည်။

ယင်းဆုံးဖြတ်ချက်အပေါ် အမေရိကန်အသင်းနည်းပြ ပိုချက်တီနိုက အဆိုပါအနီကတ်ပြစ်ဒဏ်မှာ မတရားကြောင်းနှင့် ဖီဖာ၏ လတ်တလော ဆုံးဖြတ်ချက်မှာ တရားမျှတမှုရှိကြောင်း ကာကွယ်ပြောဆိုခဲ့သည်။

သို့သော်လည်း ပြိုင်ဘက် ဘယ်လ်ဂျီယံ ဘောလုံးအဖွဲ့ချုပ်နှင့် နည်းပြ ရူဒီဂါစီယာ တို့ကမူ ဖီဖာ၏ လုပ်ရပ်သည် ပြိုင်ပွဲစည်းမျဉ်းများကို တိုက်ရိုက်ဆန့်ကျင်နေပြီး ဘောလုံးလောက၏ တရားမျှတစွာ ယှဉ်ပြိုင်ခြင်း  ဆိုင်ရာ အခြေခံမူများနှင့် ဂုဏ်သိက္ခာကိုပါ ပြင်းပြင်းထန်ထန် ချိုးဖောက်ရာရောက်ကြောင်း ဝေဖန်ရှုတ်ချခဲ့ကြပြီး ယခုကိစ္စအပေါ် ဥပဒေကြောင်းအရ ဆက်လက်ရင်ဆိုင်သွားရန် နည်းလမ်းများကို ရှာဖွေနေကြောင်း သိရှိရသည်။

( ကိုးကား - CNN )