ကမ္ဘာ့ဘဏ်နှင့်IMFဆန့်ကျင်ဆန္ဒပြပွဲဆက်လက်ဖြစ်ပွား၊ရဲအတားအဆီးကြားသင်္ကေတပြဆန္ဒပြပြီး အလုပ်သမားအဖွဲ့၏တောင်းဆိုစာလက်ခံရရှိ

ဘန်ကောက် ၊ အောက်တိုဘာ ၁၆ ၊ Horizons

ထိုင်းနိုင်ငံဘန်ကောက်မြို့တွင် ကမ္ဘာ့ဘဏ်(World Bank)နှင့်အပြည်ပြည်ဆိုင်ရာငွေကြေးရန်ပုံငွေအဖွဲ့(IMF)တို့၏ နှစ်ပတ်လည်အစည်းအဝေးကိုဆန့်ကျင်သည့်ဆန္ဒပြမှုများ ယနေ့အောက်တိုဘာ(၁၆)ရက်တွင်ဆက်လက်ဖြစ်ပွားနေပြီး ရဲတပ်ဖွဲ့ကလမ်းများကိုကွန်တိန်နာများနှင့်ပလတ်စတစ်အတားအဆီးများဖြင့်ပိတ်ဆို့ထားသည့်ကြားမှ ဆန္ဒပြသူများကသင်္ကေတပြလှုပ်ရှားမှုများပြုလုပ်ခဲ့ကြသည်။

တစ်ချိန်တည်းတွင် ထိုင်းနိုင်ငံပိုင်လုပ်ငန်းများအလုပ်သမားဆက်ဆံရေးအဖွဲ့ချုပ်၏ကန့်ကွက်တောင်းဆိုစာကို IMFနှင့်ကမ္ဘာ့ဘဏ်တာဝန်ရှိသူများကလက်ခံရယူခဲ့ကြသည်။

• 

• 

• 

• 

ယနေ့အောက်တိုဘာ(၁၆)ရက်နံနက်(၁၁)နာရီ(၂၀)မိနစ်တွင် ကမ္ဘာ့ဘဏ်နှင့်IMFကိုဆန့်ကျင်သည့် ပြည်သူ့ကွန်ရက်အဖွဲ့ဝင်များက“NO WORLD BANK & NO IMF”ဟုရေးသားထားသည့် အစိမ်းရောင်နှင့်အနက်ရောင်မီးပုံးပျံများကို လေဖြည့်ခဲ့ကြသည်။

ဆန္ဒပြသူများကမီးပုံးပျံများသည် ၎င်းတို့၏အသက်ရှူသံကိုကိုယ်စားပြုကြောင်းပြောဆိုခဲ့ပြီး မီးပုံးပျံများကိုအနက်ရောင်အိတ်များထဲစုထည့်ကာ ရဲတပ်ဖွဲ့ရှေ့တွင်သွန်ချခဲ့ကြသည်။ယင်းလှုပ်ရှားမှုသည် အဖွဲ့အစည်းနှစ်ခု၏မူဝါဒများအပေါ် ကန့်ကွက်မှုကို သင်္ကေတဖြင့်ဖော်ပြခြင်းဖြစ်သည်။

ကမ္ဘာ့ဘဏ်နှင့်IMFတို့၏စီးပွားရေးမူဝါဒများကြောင့် ဒေသခံလူထုနှင့်အလုပ်သမားများအပေါ်သက်ရောက်မှုများကို မီးမောင်းထိုးပြရန်ဆန္ဒပြကွန်ရက်သည် ယမန်နေ့အောက်တိုဘာ(၁၅)ရက်ကတည်းကဘန်ကောက်မြို့ရာမ(၄)လမ်းဆုံအနီးတွင် ညအိပ်အခြေချဆန္ဒပြနေခြင်းဖြစ်သည်။

ရဲတပ်ဖွဲ့ကလည်းအစည်းအဝေးကျင်းပရာ Queen Sirikit National Convention Centreအနီးရှိလုံခြုံရေးသတ်မှတ်နယ်မြေသို့ ဝင်ရောက်ခွင့်လက်မှတ်မရှိသူများကိုတားမြစ်ထားပြီး ရဲတပ်ဖွဲ့ဝင်အများအပြားချထားခဲ့သည်။

ယင်းနေ့တွင်ပင် ထိုင်းနိုင်ငံပိုင်လုပ်ငန်းများအလုပ်သမားဆက်ဆံရေးအဖွဲ့ချုပ်(State Enterprises Workers’ Relations Confederation)က ကမ္ဘာ့ဘဏ်နှင့်IMFတို့၏ဘဏ္ဍာရေး၊ကုန်သွယ်ရေးနှင့် ရင်းနှီးမြှုပ်နှံမှုဆိုင်ရာမူဝါဒများကိုကန့်ကွက်သည့် တောင်းဆိုစာကိုပေးအပ်ခဲ့သည်။IMFတာဝန်ရှိသူEmilia Berazateguiနှင့် ကမ္ဘာ့ဘဏ်အုပ်စုမှRose Kimeu Craigueတို့က အဆိုပါတောင်းဆိုစာကိုလက်ခံရယူခဲ့ကြသည်။

အလုပ်သမားအဖွဲ့ချုပ်က အဆိုပါအဖွဲ့အစည်းနှစ်ခု၏မူဝါဒများသည် အလုပ်သမားများနှင့်ပြည်သူလူထုကိုထိခိုက်နစ်နာစေနိုင်ကြောင်းထောက်ပြကာ ကန့်ကွက်ခဲ့ခြင်းဖြစ်သည်။တောင်းဆိုစာကိုလက်ခံရယူခဲ့သော်လည်း အဆိုပါအချက်များအပေါ်ကမ္ဘာ့ဘဏ်နှင့်IMFတို့က မည်သို့တုံ့ပြန်မည်ဆိုသည်ကိုလက်ရှိရရှိထားသည့်အချက်အလက်များတွင် ဖော်ပြထားခြင်းမရှိသေးပေ။

ကမ္ဘာ့ဘဏ်နှင့်IMFတို့၏နှစ်ပတ်လည်အစည်းအဝေးကို ဘန်ကောက်မြို့တွင်ပြီးခဲ့သည့်အောက်တိုဘာလ(၁၂)ရက်မှ (၁၈)ရက်အထိကျင်းပနေခြင်းဖြစ်သည်။

အစည်းအဝေးကာလအတွင်းဆန္ဒပြသူများက စီးပွားရေးမူဝါဒများကြောင့်ထိခိုက်နစ်နာသည့်ပြည်သူများနှင့် အလုပ်သမားများ၏အခွင့်အရေးများကို အလေးထားရန်တောင်းဆိုနေကြပြီး ရဲတပ်ဖွဲ့၏လုံခြုံရေးအတားအဆီးများကြားမှ ဆန္ဒထုတ်ဖော်မှုများဆက်လက်ပြုလုပ်နေကြသည်။

Photo - Thai Enquirer