"စေတနာမဲ့ ခရိုနီ" တွေနဲ့ ပစ္စည်းမဲ့ပေမဲ့ စည်းကမ်းမမဲ့တဲ့ "ပြည်သူ"
နေပြည်တော်က အာဏာရူးအဘတွေနဲ့ ပူးပေါင်းပြီး တိုင်းပြည်ရဲ့သယံဇာတတွေကို ခေါင်းပုံဖြတ် စုပ်သွေးစုပ်နေကြတဲ့ ခရိုနီတွေရဲ့စရိုက်မှန်ကို ဒီကာတွန်းလေးက ဖွင့်ချလိုက်တာပါပဲ။
ကာတွန်းထဲက လူငယ်တစ်ယောက်က "ခရိုနီ ဆိုတာ ဥစ္စာပစ္စည်း ပဲရှိတာ၊ စည်းကမ်းမရှိ၊ ပြည်သူအပေါ် စေတနာမရှိ" လို့ ပြောဆိုထားပါတယ်။တကယ့်မြေပြင်အခြေအနေမှာလည်း ဒီအတိုင်းပါပဲ။အဘတို့ရဲ့ကျောထောက်နောက်ခံ ခရိုနီကြီးတွေဟာ ကိုယ်ကျိုးစီးပွားတစ်ခုတည်းကိုသာ ကြည့်ပြီး တိုင်းပြည်ရဲ့ငွေကြေးဓနတွေကို မတရားလက်ဝါးကြီးအုပ်ထားကြတာပါ။တိုင်းပြည်ကြီး မီးလောင်တိုက်သွင်းခံနေရချိန်၊ ပြည်သူတွေ သောကရောက်ပြီးမွဲပြာကျနေချိန်မှာ သူတို့မှာ ဘယ်လိုလူ့ကျင့်ဝတ်စည်းကမ်းမှလည်း မရှိသလို ပြည်သူ့အပေါ်ထားတဲ့ စေတနာဆိုတာလည်း လုံးဝ မရှိပါဘူး။
ဒါပေမဲ့ ပြည်သူတွေရဲ့ရပ်တည်ချက်ကတော့ အဲဒီလောဘရမ္မက်ကြီးလှတဲ့ ခရိုနီတွေနဲ့တခြားစီပါပဲ။ဒုတိယလူငယ်က "တို့က ပစ္စည်းပဲမဲ့တာ၊ စည်းကမ်းမမဲ့၊ ပြည်သူအချင်းချင်း စေတနာမမဲ့" ဆိုပြီး တုံ့ပြန်လိုက်ပါတယ်။အာဏာရူးစစ်အုပ်စုရဲ့ ဖျက်ဆီးမှု၊ မီးရှို့မှုတွေကြောင့် ပြည်သူတွေခမျာ အိုးအိမ်ပစ္စည်းတွေဆုံးရှုံးပြီး ပစ္စည်းမဲ့ဘဝကို ရောက်နေရပေမဲ့ သူတို့ရဲ့ စိတ်ဓာတ်နဲ့ ကိုယ်ကျင့်တရားကတော့ ဘယ်တော့မှမပျက်ယွင်းပါဘူး။ဒုက္ခရောက်နေတဲ့ အချိန်မှာတောင် ပြည်သူအချင်းချင်း တစ်လုပ်စားလည်း မျှဝေစားသောက်ပြီး ရိုင်းပင်းကူညီကြတဲ့ စေတနာတရားတွေက အပြည့်အဝ ရှင်သန်နေဆဲပါ။
ခိုးဝှက်ထားတဲ့ ဥစ္စာပစ္စည်းတွေ ပြည့်လျှံနေပေမဲ့ လူလုံးမလှလောက်အောင် စိတ်ဓာတ်အောက်တန်းကျနေတဲ့ အဘတို့ရဲ့ ခရိုနီတစ်သိုက်နဲ့ အရာအားလုံးဆုံးရှုံးထားရပေမဲ့ စိတ်ဓာတ်ခိုင်မာပြီး အချင်းချင်းရိုင်းပင်းနေကြတဲ့ ပြည်သူလူထုရဲ့ မွန်မြတ်လှတဲ့ သရုပ်မှန်ကို နှိုင်းယှဉ်ပြီး သရော်လှောင်ပြောင်ထားတဲ့ ကာတွန်း ဖြစ်ပါတယ်ခင်ဗျာ။
ကာတွန်း - လင်းလွန်း
ရေးသားသူ - သူပုန်ပါပီ
Comments